DILI, 13 Marsu 2025 (TATOLI)-Autoridade Munisipál Dili (AMD), prepara ona ekipamentu atu investe kona-ba kuadru estasionamentu iha área Kristu-Rei nian, tanba programa ne’e lansa ona iha sesta semana kotuk iha, Palásiu Governu.
“Sim, estasionamentu ne’e ita halo ona lansamentu iha sesta kotuk, iha Palásiu Governu, no oinsá ita prepara ona para sira bele investe ona motorizada no kareta ne’ebé halo movimentu iha Kristu-Rei”, Sekretáriu Asuntu Sosiais no Organizasaun Munisípiu Dili, Tomas Barros, ba jornalista TATOLI, hafoin formasaun iha salaun Lalini-Larigutu, CNE, Kolmera, Dili, ohin.
Tanba movimentasaun iha área Kristu-Rei ne’e maka’as, nune’e labele abandona hodi trata fatin estasionamentu no ba futuru sei halo jardin ne’ebé mak di’ak, nune’e bele hetan rendimentu ba Estadu.
“Motór ho karreta ne’ebé halo movimentu iha Kristu-Rei maka’as tebetebes entaun ita labele husi abandona hela de’it ida-ne’e, oinsá ita trata fila fali ba futuru halo tan jardin ne’ebé di’ak, ita komesa hakat neneik para oinsá ita bele hetan mós rendimentu husi ne’ebá bá Estadu ida-ne’e”, nia hateten.
Maneira kobransa ne’e ho manuál, sei iha ajente sira ne’ebé halo kobransa ba transporte sira ne’ebé para iha Kristu-Rei, tanba daudaun ne’e mós AMD halo rekrutamentu tan ba ajente kobransa estasionamentu hamutuk na’in-lima nulu hodi ajuda tan ajente tuan sira iha servisu kobransa estasionamentu, aleinde servisu estasionamentu maibé sai mós kazuál sira ba semitériu sira no jardin.
“Agora ita la’o uluk ho kobransa manuál, no ita iha ema foin daudaun ita rekruta tan ema na’in lima nulu iha semana kotuk asina ona kontratu, no aumenta tan sira ne’ebé daudaun ne’e servisu hela. Ida-ne’e mós la’ós de’it estasionamentu de’it, maibé ligadu mós ligadu ba parte kasuais no ita destaka mós ba fatin semitériu sira atu ajuda, prepara ba prosesu vulneráriu no ba jardin sira”, nia hatutan.
Sekretáriu ne’e hatutan tan, “Kona-ba rendimentu ne’ebé ita hetan husi estasionamentu ne’e, ajente kobransa sei entrega ba supervizór hodi koloka ba iha Autoridade Munisipál no orsamentu sira ne’e mak sei tau fali ba planu anuál no halo relatóriu ba Ministériu Finansas hodi hatene kona-ba rendimentu kada tinan”.
Estabelesimentu ba estasionamentu la’ós de’it iha Kristu-Rei, maibé, iha Díli laran tomak ne’ebé haree bazea ba movimentu transporte parajen ne’ebé mak maka’as no barak, normalmente tenki tau ona kuadru estasionamentu atu hetan rendimentu no hamenus agrafamentu iha kapitál.
Jornalista: Alexandra da Costa
Editór: Rafael Ximenes de A. Belo
