DILI, 07 Abríl 2025 (TATOLI)-Diretór Nasionál Ensinu Sekundáriu Jerál (DNESJ) iha Ministériu Edukasaun (ME), Benjamin Fernandes, husu ba diretór eskola sira atu jere profesór ba matéria lian-portugés, tetun, multimedia, desportu no seluk tan, nune’e estudante sira labele lakon disiplina ida.
“Diretór eskola hotu-hotu iha nia maneira oinsá jere profesór iha kada eskola, kuandu profesór ba disiplina ida mak laiha tenke buka profesór neʼebé iha koñesimentu ba disiplina ne’ebé laiha. Ho ida ne’e mak ministériu edukasaun loke vaga”, nia tenik.
“En-prinsipiu, eskola ensinu sekundáriu iha territóriu ne’ebé profesór menus ne’e iha matéria língua portugeza, lian tétun ho tan disiplina ida multimídia, desportu, no mós matéria sira seluk. Ho ida-ne’e mak Ministériu Edukasaun loke vaga,” nia katak.
Totál profesór ba ensinu sekundáriu ne’ebé sai ona permanente iha territóriu hamutuk 1.394, hosi totál ne’e ministériu aloka osan millaun $6-resin ba tinan ida nian.
Kestaun falta profesór ba disiplina ne’ebé mensiona akontese iha Eskola Sekundáriu Jerál (ESJ) FINANTIL.
“Profesór ne’ebé hanorin disiplina matemátika, tenke hanorin iha multimedia”, Diretór ESJ Finantil, Aniceto Berlelo, ba TATOLI iha nia knaar fatin Aimutin, ohin.
Nia dehan, ida-ne’e la’ós husi ME mak la prepara, maibé ema mak to’o agora seidauk hatama vaga.
Tuir lei kurikulu, profesór sira ne’ebé mak hanorin ne’e tenke tuir duni ida-idak nian área espesialidade. Maibé ho limitasaun ne’ebé iha mak tenke halo subtituisaun ba disiplina ne’ebé profesór laiha.
Enkuantu Diretór EBC 10 Dezembru Komoro, Calistro Guterres, hatete iha sira-nia eskola profesór ba disiplina kompletu, no laiha defikuldade, kada loron sira la’o tuir oráriu ne’ebé mak iha.
“Iha ne’e ita bele hatete katak kompletu, maibé ami mós nafatin buka hela nesesidade emerjénsia ida, tanba iha profesór balun ne’ebé tama idade reformadu”, dehan.
Notísia relevante: ME la tolera manorin-na´in falta hanorin alunu sira sein justifikasaun
Jornalista : Osória Marques
Editora : Rita Almeida
