DILI, 07 Abríl 2025 (TATOLI)—Isabel Maria Fernandes de Jesus no Benevides Correira Barros re-eleitu reprezenta Parlamentu Nasionál (PN) nu’udar konsilleiru iha Konsellu Imprensa (KI) ba períodu tinan-haat, hahú tinan 2025-2028.
PN hili sidadaun na’in rua ne’e liuhusi sesaun plenária, segunda ne’e.
Kandidatu na’in-rua mai ho pakote úniku, ne’ebé Isabel Maria propoin husi Bankada Governu husi Kongresu Nasionál Rekonstrusaun Timorense (CNRT) ba área komunikasaun sosiál no Benevides Correia propoin husi Bankada Partidu Demokrátiku (PD) ba área jurídiku nian.
Notísia relevante : Bankada CNRT propoin rekandidata Isabel Maria Fernandes de Jesus ba Konsellu Imprensa
Prosesu votasaun eskrutinu ka sekretu ne’e ho rezultadu votu afavór 38, kontra 0 no abstensaun hitu, ho Deputadu iha kórum 45.
“Agradese ba partisipasaun hotu-hotu nian iha votasaun ida-ne’e,” Prezidente Parlamentu Nasionál, Maria Fernanda Lay, fó sai iha sala plenária.
PN tenke hili ema na’in-rua ne’ebé méritu iha komunikasaun sosiál no ema ida nu’udar jurista ne’ebé esperiénsia iha área jurídiku, hodi reprezenta sai konselleiru iha KI.
Tuir Lei Komunikasaun Sosiál númeru 5/2014, 19 Novembru iha artigu 45 kona-ba kompozisaun KI, iha membru na’in-lima, ne’ebé hili liuhusi dalan tuir mai :
1. Reprezenta jornalista na’in-rua ne’ebé sira hili tiha ona liuhusi eleisaun;
2. Reprezentante órgaun komunikasaun sosiál ida, ne’ebé órgaun sira hili tiha ona liuhusi eleisaun;
3. Sidadaun na’in-rua ne’ebé ho kapasidade ne’ebé ema hotu hatene no iha méritu profisionál ho preferénsia ne’ebé hatutan ba komunikasaun sosiál, husi sira na’in-rua ida nu’udar jurista, ne’ebé Parlamentu Nasionál hili;
4. Membru sira Konsellu Imprensa hili entre sira-nia Prezidente.
Artigu 46 ko’alia kona-ba mandatu ba membru sira ho durasaun tinan-haat, ne’ebé sei renova dala-ida de’it.
Sesaun plenária ne’e akompaña mós husi Vise-Ministru Asuntu Parlamentár, Adérito Hugo da Costa no Sekretáriu Estadu Komunikasaun Sosiál, Expedito Dias Ximenes.
Jornalista : Nelson de Sousa
Editora : Julia Chatarina
