DILI, 20 Marsu 2025 (TATOLI)–Bankada Governu husi Kongresu Nasionál Rekonstrusaun Timorense (CNRT) propoin rekandidata Isabel Maria Fernandes de Jesus, husi Parlamentu Nasionál (PN) ba Konsellu Imprensa (KI).
“Ha’u kandidatu úniku ne’ebé propoin husi Bankada CNRT ba área meiu komunikasaun sosiál iha loron hirak liubá depois submete dokumentu sira husi bankada haree nomós iha kontaktu pedidu ida atubele ohin mai halo audisaun ho Komisaun G,” Isabel Maria hateten iha resintu PN, kinta ne’e.
Antes ne’e, PN liuhusi reuniaun plenária hili Isabel Maria Fernandes de Jesus hodi troka Expedito Dias Ximenes sai membru KI.
Notísia relevante : Faluchay retira husi kandidatura Konsellu Imprensa
Atuál membru KI ne’e hakarak rekandidata-an tanba hakarak kontinua serbisu sira ne’ebé iha ona hanesan implementa planu estratéjiku KI nian no kapasitasaun rekursu umanu ba jornalista.
“Hanesan feto ida, hakarak hateten tinan-ida ho balun seidauk sufisiente ida atu hetan esperiénsia, liuliu kona-ba lalaok serbisu konsellu nian, tanba ne’e motiva ha’u atubele mai submete dokumentu ba vaga ne’ebé sira loke,’’ nia akresenta.
Notísia relevante : PN hili Isabel Maria Fernandes de Jesus substitui Expedito ba membru CI
Durante audisaun ho Komisaun G ne’ebé trata asuntu Edukasaun, Juventude, Desportu no Sidadania, ho kandidatu sira hodi rona filafali sira-nia hanoin no Deputadu sira iha esperansa bainhira eleitu atu hala’o knaar ho di’ak no mantein nafatin regulamentu.
“Tanba ha’u reprezenta nu’udar profisionál komunikasaun sosiál nian, tanba ne’e iha papél importante tebes bele haree serbisu meiu komunikasaun sosiál iha Timor-Leste,’’ nia tenik.
Komisaun halo mós halo audisaun ba kandidatu iha área jurídiku ne’ebé propoin husi Bankada Governu husi Partidu Demokrátiku (PD), Benevides Correira Barros, ne’ebé hato’o ninia disponibilidade.
Komisaun aprova ona relatóriu no sei submete ba meza Prezidente PN hodi deside eleisaun kandidatu iha plenária.
Tuir Lei Komunikasaun Sosiál, PN tenke hili ema na’in-rua ne’ebé méritu iha komunikasaun sosiál no ema ida nu’udar jurista ne’ebé iha esperíensia iha área jurídiku.
Tuir Lei Komunikasaun Sosiál númeru 5/2014, 19 Novembru, iha artigu 45 kona-ba kompozisaun KI hamutuk membru na’in-lima, ne’ebé atu hili liuhusi dalan tuir mai :
- Reprezentante jornalista na’in-rua ne’ebé sira hili tiha
ona liuhusi eleisaun; - Reprezentante órgaun komunikasaun sosiál ida, ne’ebé
órgaun sira hili tiha ona liuhusi eleisaun; - Sidadaun na’in-rua ne’ebé ho kapasidade ne’ebé ema hotu
hatene no iha méritu profisionál ho preferénsia ne’ebé
hatutan ba komunikasaun sosiál, husi sira na’in-rua ida
nu’udar jurista, ne’ebé Parlamentu Nasionál hili; - Membru sira Konsellu Imprensa hili entre sira-nia prezidente.
Artigu 46 ko’alia konaba mandatu ba membru sira ho durasaun tinan-haat, ne’ebé sei bele renova dala-ida de’it.
Jornalista : Nelson de Sousa
Editora : Julia Chatarina
