DILI, 07 Abríl 2025 (TATOLI)–Ministru Komérsiu no Indústria, Filipus Nino Pereira, hateten katak Ministériu Komérsiu no Indústria (MCI-sigla portugés) hein hela sertifikadu entrega ba konstrusaun parke industriál iha Ulmera, Likisá.
“Ita ko’alia kona-ba parke industriál Ulmera, Likisá, ami konklui enkontru ho komunidade kona-ba entrega rai no ami hein hela sertifikadu alokasaun rai husi Ministériu Justisa,” Filipus Nino Pereira dehan ba TATOLI iha Lahane, Dili, semana kotuk.
Nino Pereira esplika katak karik atribui sertifikadu ba MCI mak Governu sei kontinua prosesu konstrusaun ba parke ne’e rasik.
Notísia relevante: Rezultadu estudu viabilidade hatudu Ulmera viável harii parke industriál
Tuir ministru, projetu konstrusaun ka investimentu ba parke industriál ne’e bele sai hanesan Projetu Públiku-Privadu (PPP) hodi atrai investidór estranjeiru sira.
“Ita bele aplika modelu investimentu hanesan Governu bele investe 100% ka Projetu Públiku-Privadu. Ita sei halo koordenasaun ho Banku Mundiál hodi fasilita ita-nia tékniku sira atu diskute opsaun no modelu PPP ne’e,” nia haktuir.
Nino afirma, ho hanoin katak konstrusaun parke industriál ne’e ho objetivu atu diversifika ekonomia nasionál tuir Planu Estratéjiku Dezenvolvimentu Nasionál tinan 2011 no 20230. Governu aloka ona montante hamutuk dolar amerikanu rihun 200 ba estudu viabilidade ba konstrusaun parke industriál ne’ebé medida ektare 50 iha Ulmera, Likisá.
Jornalista: Felicidade Ximenes
Editór: Xisto Freitas da Piedade
