EKONOMIA, HEADLINE

Rezultadu estudu viabilidade hatudu Ulmera viável harii parke industriál

Rezultadu estudu viabilidade hatudu Ulmera viável harii parke industriál

Ilustrasaun parke industriál. Imajen/Espesiál

DILI, 22 setembru 2022 (TATOLI)—Diretór Nasionál Dezenvolvimentu Industriál iha Ministériu Turizmu Komérsiu no Indústria (MTKI), Fernando Lobato, hateten, bazeia ba rezultadu estudu viabilidade, hatudu katak parke industriál viável liu harii iha suku Ulmera, postu administrativu Bazartete, munisípiu Liquiçá.

“Sira finaliza ona relatóriu finál estudu viabilidade no hatudu katak entre Ulmera ho Vatuvou ne’e, Ulmera viavél liu halo konstrusaun parke industriál,” Diretór informa ba Agência Tatoli, iha ninia Knaar fatin, Bebora, kinta ne’e.

Notísia relevante: MTKI kontrata kompañia Haberan inisia estudu viabilidade ba parke industriál Ulmera

Estudu viabilidade ne’e rasik tuir kontratu hahú iha fulan-abril no ramata iha jullu 2022, ne’ebé toma-konta hosi empreza Haberan Unip.Lda no PT.ITS Tekno Sains Surabaya Indonézia.

“Relatóriu estudu viabilidade entrega ona ba Governu no ministériu relevante sira. Planu Governu bainhira Ulmera estabelese parke industriál, ita halo Ulmera hanesan bloku A no Vatuvou hanesan bloku B,” nia akresenta.

Ho rezultadu estudu viabilidade ne’ebé iha ona, ba oin prepara tan dezeñu no Bill of Quantity (BoQ) tanba programa estabelese parke industriál ne’e hanesan programa multianuál la’ós ba tinan-ida de’it.

“Ita sei envolve Ajénsia Dezenvolvimentu Nasionál (ADN), Komisaun Nasionál Aprovizionamentu (CNA, sigla portugés), Sekretáriu Estadu Grande Projetu (SEGP) ba prosesu halo dezeñu tanba SEGP mak sei prevee orsamentu,” nia akresenta.

Aleinde ne’e, ekipa responsável sira hasoru difikuldade oituan iha terrenu tanba rai iha Ulmera ne’e pertense ba Estadu, ne’ebé iha agregadu família hamutuk 37 hela kleur ona, tanba ne’e presiza halo verifikasaun di’ak.

“Ministériu Justisa presiza halo verifikasaun ba estatutu rai hodi deklara no aproxima komunidade hodi sai hosi fatin ne’e,” nia dehan.

Kustu ba estudu viabilidade iha rai ektare 50 iha Ulmera hamutuk $225.735 no harii parke industriál tomak hamutuk millaun $32.

Jornalista    : Arminda Fonseca

Editora         : Julia Chatarina

iklan
iklan

Leave a Reply

iklan
error: Content is protected !!