Membru PN husu autoridade kompetente investiga ICCTL
DILI, 07 Abríl 2025 (TATOLI)–Deputada Bankada Governu husi Kongresu Nasionál Rekonstrusaun Timorense (CNRT), Cedelízia Farria dos Santos, husu ba autoridade kompetente atu investiga prezensa Igreja Katólika Karizmátiku Timor-Leste (ICCTL) ne’ebé daudaun ne’e sai polémika iha públiku.
“Ha’u preokupa ho Igreja Katólika Karizmátiku Timor-Leste ne’ebé ikus-ikus ne’e sai polémika iha públiku, ne’e la’ós buat segredu ida tanba públiku hotu akompaña, hanesan reprezentante povu ha’u mós preokupa ho ida-ne’e,” Membru Parlamentu Nasionál (PN) ne’e hato’o liuhusi reuniaun plenária PN, segunda ne’e.
Nia akompaña iha publikasaun balun iha rede sosiál, katak membru ida ho ninia funsaun hanesan mós manorin-na’in tau ninia kartaun eleitorál no hateten sira-nia aktu ne’e hetan apoiu orsamentu husi ema balun.
“Ne’e tau naran kompletu, osan mós iha ne’ebá. Ha’u hanoin ne’e sériu tebes, se bele ami husu Ministériu Interiór liuhusi Komadante PNTL no PSIK atubele halo investigasaun,” nia hato’o.
Notísia relevante : DIK konklui investigasaun ‘’Padre Falsu’’ no submete ona ba Ministériu Públiku
Aleinde, Deputada ne’e akompaña, grupu ne’e mós lori saudozu Bispu Martinho no Amu Bispu Dom Carlos nia naran.
“Entaun ida-ne’e ladi’ak tanba atu soran ita sarani sira. A’at liután mak ami rona esplikasaun hateten, sira uza batina ne’e tanba sira-nia osan, imi hela ho osan ba ami hela ho batina, ida-ne’e ha’u sente ida dehan ataka ka halo buat ruma kontra relijiaun, liuliu hanesan sarani ita sente triste,” nia preokupa.
Deputada ne’e hateten, Timor-Leste foin susesu organiza vizita Amu Papa nian no mundu hotu apresia ho Timor ninia maturidade.
“Ami husu Governu atu tau-atensaun ba buat sira ne’e, lei fó dalan ba liberdade mais liberdade ida loloos no liberdade ida labele defama fali relijiaun seluk, liberdade ne’e atu insulta fali ema seluk,” nia hato’o.
Iha fatin hanesan, Deputadu Bankada Opozisaun husi Kmanek Haburas Unidade Timoroan (KHUNTO), António Verdial de Sousa, preokupa ho kestaun hanesan no husu Governu atu tau-atensaun ba liberdade iha rede sosiál.
Vise-Ministru ba Asuntu Parlamentár, Adérito Hugo da Costa, hateten asuntu ne’e Ministru Justisa resposta ona nune’e nia-parte labele resposta tan.
“Maibé hanesan sarani Katólika, ha’u lamenta ba uzu atributu no matéria sira ne’ebé ataka identidade maioria Katóliku iha Timor-Leste nian, sente sasán ne’e tenke tau ihs nia fatin,” nia katak.
Antes ne’e, Ministru Justisa, Sergio Hornai, deklara, ezisténsia ICCTL ne’e ilegál.
Jornalista : Nelson de Sousa
Editora : Julia Chatarina
