DILI, 26 novembru 2024 (TATOLI) – Xefe Departamentu Investigasaun Kriminál (DIK) Nasionál, Komandu Jerál Polísia Nasionál Timor-Leste, Superintendente Xefe Polísia João Belo dos Reis, dehan investigasaun hotu ona, ba sidadaun na’in-lima ne’ebé suspeita padre falsu no submete ona auto notísia ba Ministériu Públiku.
“Komandante Jerál koalia tiha ona kona-ba oinsa mak polísia halo investigasaun. Agora ha’u aprezenta de’it ba maluk sira katak servisu investigasaun kriminál elebora ona nia relatóriu ba sidadaun na’in-lima ne’e horseik ami halo indentifikasaun ne’e. Ami foti ona sira-nia deklarasaun hotu. Ami elabora ona sira-nia deklarasaun. Tanba ne’e atu dehan de’it katak ami halo identifikasaun ba ema na’in-lima. Ami konklui ona prosesu ida-ne’e no aprezenta ona auto notísia ba Ministériu Públiku hodi prosesa ba oin”, João Belo hateten ba jornalista iha Sentru Formasaun Polísia (CFP, sigla portugés) Comoro, tersa, ohin.
Nia dehan, Departamentu Investigasaun Kriminál, atualmente, seidauk bele pronunsia buat ruma ba sidadaun na’in-lima tanba ida-ne’e hola parte iha segredu justisa.
“Ida-ne’e segredu justisa, labele koalia tanba ami aprezenta ba Ministériu Públiku, ba prosesu tuir mai ne’e Ministériu Públiku mak sei análize auto notísia sira ne’ebé ami aprezenta ba ne’e. Karik iha análize Ministériu Públiku nia priénse elementu krime ou lae ne’e, Ministériu Públiku mak hatene”, nia adianta.
Komandante Belo rekorda, hafoin identifikasaun, Departamentu Investigasaun Kriminál husik sidadaun na’in-lima hodi fila ba idak-idak nia uma.
“Horseik ne’e ita halo de’it identifikasaun ba sira no ita husik sira fila fali ba idak-idak nia uma, ohin, ita submete ona sira-nia auto notísia ba Ministériu Públiku depois mak ita hein fali delagasaun kompeténsia husi Ministériu Públiku, kuandu dehan kontinua halo prosesu investigasaun ba sira na’in-lima, ne’e ami prontu”, nia konklui.
Notísia relevante : DIK identifika no dirijente ICCTL esklarese razaun
KHUNTO husu kria lei liberdade relijioza regula grupu relijiaun tama TL
Igreja aproxima PNTL halo investigasaun ba prezensa Seita ICCI-TL
Jornalista :Natalino Costa
Editór : Zezito Silva
