VIKEKE, 07 Abríl 2025 (TATOLI)—Xefe Sentru Saúde Uatukarbau, munisípiu Vikeke, Caetano Gaspar, informa, pesoál saúde na’in-12 iha postu Uatukarbau kontratu foin lalais ramata ona, maibé kontinua serbisu.
“Sira-nia kontratu ramata iha loron 31 Marsu, nune’e agora pesoál saúde kontratadu sira seidauk asina sira-nia kontratu, maibé sira kontinua apoia serbisu iha sentru saúde no postu saúde sira ho voluntáriu de’it mak fó atendimentu ba komunidade iha postu Uatukarbau,” Caetano Gaspar, hateten ba Agência Tatoli, iha postu Uatukarbau, segunda ne’e.
Notísia relevante : Sentru saúde Uatukarbau rejista moras IRA 1.375 iha trimestre dahuluk
Pesoál saúde na’in-12 ne’ebé kompostu husi enfermeiru, parteira no médiku durante ne’e koloka iha postu saúde sira hodi fó atendimentu ba komunidade lokál no hala’o programa saúde iha postu Uatukarbau.
“Pesoál saúde kontratadu sira-ne’e apoiu tebes ita tanba sira durante ne’e dezloka iha postu saúde sira, maibé sira-nia kontratu ramata, foin lalais ha’u haruka ona pedidu ba munisípiu hodi halo estensaun kontratu ba pesoál saúde sira, se la kontinua kontratu postu saúde sira sei hasoru difikuldade,” nia akresenta.
Hatán ba preokupasaun ne’e, Diretór Servisu Saúde Munisípiu Vikeke, Aljacsono S. Maia, hateten, nia parte fó ona orientasaun ba Xefe sentru saúde atu hatama nafatin pesoál saúde sira-ne’e ba forsa traballu.
“Nune’e ezije pesoál saúde sira kontinua serbisu hanesan kontratadu. Ha’u haruka ona karta kona-ba forsa traballu bá nasionál hodi haree pesoál saúde kontratadu sira-nia kontratu ne’ebé ramata. Ita hein agora iha ona prosesu, ne’ebé iha tempu badak sira sei asina kontratu,” nia katak.
Daudaun ne’e, pesoál saúde hamutuk na’in-31 iha munisípiu Vikeke maka ninia kontratu ramata. Pesoál hirak ne’e destaka ba sentru saúde lima hanesan Lakluta, Vikeke Vila, Ossu, Uatulari no Uatukarbau.
Jornalista : Vitorino Lopes da Costa
Editora : Julia Chatarina
