DILI, 07 Abríl 2025 (TATOLI) – Prezidente Repúblika, José Ramos Horta, no membru Konsellu Superiór Defeza no Seguransa (KSDS) diskute knaar esensiál Estadu nian, liuliu instituisaun seguransa FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL) no Polísia Sientífiku Investigasaun Kriminál (PSIK).
“Reuniaun ohin ne’e ho ajenda ida de’it, atu haree hamutuk knaar esensiál husi instituisaun Estadu nian hanesan F-FDTL, PNTL, no PSIK nian kona-ba kontrolu armamentu no munisaun iha ita-nia país”, portavós KSDS, João Aparício Guterres hateten ba jornalista sira hafoin reuniaun, iha Palásiu Prezidensiál Dili, ohin.
Nia dehan meiu ida-ne’e atu hametin kapasidade hodi garante pás, seguransa no estabilidade iha rai-laran.
“Iha parte seluk atu garante seguransa ba ita-nia populasaun, mantein orden públika iha Timor-Leste no partisipasaun ativa iha sidadaun sira hotu ba seguransa nasionál”, dehan.
Nia hatutan aspeitu ida ne’ebé importante liu mak oinsá atu halo kontrolu ida ne’ebé rigór kona-ba utilizasaun arma ho koordenasaun.
“Iha reuniaun ne’e ko’alia mós oinsá atu halo kapasitasaun [ba] instituisaun tolu nian, nune’e sira bele iha disiplina no étika atu utiliza kilat”, nia konklui.
Notísia relevante: KSDS hala’o avaliasaun situasaun seguransa tinan 2024
Jornalista: Hortencio Sanchez
Editora: Maria Auxiliadora
