DILI, 07 Abríl 2025 (TATOLI)-Ajénsia Nasionál ba Avaliasaun no Akreditasaun Akadémika, Instituto Públiku (ANAAA, I.P), sei halo akreditasaun ba programa estudu hamutuk 22 no akreditasaun institusionál ba instituisaun rua.
Diretór Ezekutivu ANAAA, I.P, Nilton Diamantino Paiva Mau, hatete instituisaun rua ne’ebé hetan akreditasaun ba tinan ne’e mak Institutu Universidade Naroman Esperansa (IUNE ) iha Lauala Glenu, munisípiu Ermera, ne’e ba síklu dahuluk no Institutu Siénsia Saúde (ICS) ba segundu síklu.
“ICS ne’e ba akreditasaun segundu síklu tanba primeiru ne’e akredita ona iha 2019. Ba instituisaun superiór sira ne’ebé ita halo akreditasaun ne’e hetan hotu ona lisensa operasionál husi Ministériu Ensinu Superiór Siénsia no Kultura (MESSK)”, dehan Nilton iha Balide, segunda ne’e.
Nia dehan, programa hamutuk 22 ne’e iha semana kotuk hahú halo avaliasaun no akreditasaun ba programa estudu Komérsiu no Turizmu iha Universidade Nasionál Timor Lorosa’e (UNTL), no programa estudu Produsaun Animál iha Institutu Politékniku Betanu (IPB).
“Depois paskua ami sei halo akreditasaun ba kursu língua inglés iha Universidade Orientál Timor Lorosa’e (UNITAL), no mós kursu área edukasaun iha UNTL, kursu agrikultura iha Universidade da Paz (UNPAZ), kursu teologia iha Institutu Superior Filosofia i Teologia(ISFIT), nune’e mós kursu balun iha Kristal, ami sei halo to’o fulan-Outubru”, nia informa.
Nia informa, iha tinan 2024 ANAAA halo akreditasaun ba 19 kursu, no instituisaun neen.
“Instituisaun neen ne’ebé ANAAA halo akreditasaun iha 2024 mak, UCT ne’e ba primeiru síklu, institutu Ensinu superior Dom Bosco Komoro ne’e ba segundu síklu, ISFIT mós ba segundu síklu, ba ETCI Glenu ne’e terseiru síklu, UNDIL ba terseiru síklu no UNITAL ba terseiru síklu. Kursu 19 ne’e kompostu husi kursu sira husi UNITAL, IOB, UNPAZ, UNTL no ETCI”, nia informa.
Orsamentu Jerál Estadu (OJE) ba ANAA tinan-ne’e hamutuk rihun $ 801, ne’ebé ANAAA aloka ba programa rua.
“Programa rua mak hanesan, halo akreditasaun, kooperasaun, peskiza no preparasaun treinamentu ba pesoál sira ne’ebé liga direita ho ANAAA hanesan xefe departamentu, IQW no dekanu sira, orsamentu ne’e mós inklui ho alokasaun edifisiu ANAAA. Osan ba tinan ida-ne’e sufisiente ba ANAAA hodi halo servisu ba programa rua”, tenik.
Notísia relevante: ANAAA planeia halo akreditasaun ba programa 19 no instituisaun neen
Jornalista :Osória Marques
Editora : Rita Almeida
