VIKEKE, 08 Abríl 2025 (TATOLI)—Abitante husi aldeia Lamak-Klaran, suku Karaubalu, postu Vikeke Vila, munisípiu Vikeke prontu koopera ba desizasaun Governu kona-ba alargamentu estrada públiku iha área Beloi.
“Ha’u nu’udar sidadaun, prontu koopera no kolobora ho parte Governu. Tanba ne’e liga ba dezenvolvimentu iha ita-nia rai. Iha alargamentu ne’e, foin lalais Sekretaria Estadu Asuntu Toponímia no Organizasaun Urbana (SEATOU) no Autoridade Vikeke halo markasaun ba ha’u-nia kioske no uma karreta fatin nian. Karik, aban bain-rua mak Governu fó indenizasaun ruma, ha’u prontu simu de’it,” Abintante aldeia Lamak-Laran, Agustinho de Carvalho, hateten iha Beloi, tersa ne’e.
Nia dehan, daudaun ne’e ekipa SEATOU sira seidauk tun bá terrenu hodi sukat uma sira-ne’ebé foin lalais tau ona markasaun.
“Ami nu’udar komunidade hakarak fó hanoin ba parte autoridade, molok hasai ami, mai koordena uluk ho ami vítima sira, atu nune’e ami bele sai ho dignu, ida-ne’e mak ami-nia hakarak,” nia hato’o.
Notísia relevante : SEATOU husu povu Vikeke koopera ho Governu ba alargamentu espasu públiku
Iha fatin ketak, Abitante Karaubalu, Juleta Monteiro Amaral, hateten, hanesan sidadaun nia parte prontu koopera ho Estadu hodi loke espasu estrada tanba ne’e liga ba dezenvolvimentu.
“Ha’u-nia kioske mak Estadu tau ona sinál, ha’u sempre koopera ho desizaun, nu’udar timoroan kolabora ho ita-nia Estadu hodi prosesu dezenvolvimentu iha ita-nia rai bele la’o ho di’ak,” nia katak.
Enkuantu, Juleta Monteiro Amaral iha uma rua mak hetan markasaun tanba besik estrada públiku iha área Beloi.
Diretór Servisu Obra Públiku munisípiu Vikeke, Casildo Gomes Soares, hateten, kona-ba área identifikadu sira-ne’ebé mak ekipa SEATOU tau ona makrasaun, Servisu MOP Vikeke sei kontinua halo identifikasaun ba okupapante espasu públiku no besik mota.
“Ami halo identifikasaun hotu, hafoin mak halo levantamentu dadus. Kona-ba uma ne’ebé kona despeju administrativu hanesan daudaun hetan markasaun, ami sei serbisu hamutuk ho Obra Públika nasionál hodi haree ba kustu indenizasaun ba uma sira-ne’ebé afetadu. Daudaun ne’e ami seidauk rekolla dadus uma afetadu sira tanba ekipa ne’ebé autoridade forma sei tun ba terrenu hodi halo identifikasaun,” nia tenik.
Jornalista : Vitorino Lopes da Costa
Editora : Julia Chatarina
