VIKEKE, 04 Abríl 2025 (TATOLI)—Sekretáriu Estadu Asuntu Toponimia no Organizasaun Urbana (SEATOU), Geramano Santa Brites, husu povu Vikeke koopera ho Governu ba alargamentu espasu públiku atu halo sidade Vikeke sai furak.
“Ohin, ha’u mai Vikeke hodi haree espasu públiku ne’ebé sai preokupasaun ba ita. Tanba ita-nia vendedór sira faan fali iha trotoar leten, entaun difikulta ba ema la’o ain sira, atu la’o di’ak. Vikeke-oan sira prontu koopera hadi’a Vikeke sai sidade furak. Nune’e, ba abitante no nogesiante sira ne’ebé okupa espasu públiku hanesan trotoar, taka baleta, halo uma iha baleta leten bainhira ita observa hetan sobu,” Geramano Santa Brites hateten hafoin halo diálogu ho abitante sira iha Vikeke, iha salaun administrasaun Vikeke, ohin.
Governante ne’e dehan, abitante sira-ne’ebé okupa espasu públiku, Governu liuhusi SETOU iha dever sobu no depois Ministériu Obra Públiku (MOP) mak hadi’a.
“Laiha dekretu lei ida hakerek SETOU sobu hotu, SETOU selu ne’e laiha. Ami iha prosesu tolu dauluk fó avizu, daruak halo notifikasaun loron 30 lakumpre sei aumenta loron 10, lakumpre nafatin hein dezisaun, bainhira dezisaun tun ita sobu dadauk ona,” nia dehan.
Nune’e, nia fó hanoin ba sidadaun sira tenke koopera ho Governu no hakruuk ba lei, laiha ema ida hateten boot liu fali lei, lei mak aas-liu ba ema hotu-hotu iha Timor Leste.
“Nune’e, hahú ohin to’o Maiu, ha’u sei mai hodi hadi’a sidade Vikeke. Se nia uma mak hetan ona markasaun hahú sobu rasik no Diretór servisu MOP halo identifikasaun ba uma permanente sira,” nia dehan.
Iha fatin hanesan, Prezidente Autoridade munisípiu Vikeke, Francisco C.S de Gonzaga Soares, haktuir presenza SETOU hodi haree direta espasu públiku sira iha munisípiu Vikeke hodi fó servisu ba autoridade sira hala’o servisu ba dezenvolvimentu.
“Ohin, sai oportunidade ba munisípiu Vikeke presenza SETOU, hodi fó hanoin ba ita, kona-ba espasu públiku. Tanba ita haree sidade Dili agora furak, ida-ne’e orgullu boot ba jerasaun foun sira,” nia hateten.
Iha bibán ne’e, koordenadór negosiante Vikeke, Venancio Siqueira, hateten nesosiante Vikeke prontu koopera bainhira Governu kria kondisaun hodi koloka negosiante sira-ne’e tenke tau iha fatin dignu hodi hatutan sira-nia moris.
“Bainhira temi xapeo-akadiru ami tauk loos, maibé ami prontu koopera ba dezenvolvimentu iha munisípiu Vikeke. Kria mós fatin dignu atu ami bele hatutan ami-nia moris no sustenta ba ami-nia oan sira-nia moris ba loron aban,” nia dehan.
Enkuantu, remata diálogu SETOU hamutuk ho autoridade PAM no ekipa sira kontinua observa espasu públika iha área Beloi parte mota ninia no tau ona markasaun ba uma ne’ebé okupa espasu públiku purvolta 70 iha área Belo no Vikeke Vila antiga.
Entretantu, ekipa konjunta observa área Vikeke ne’e hetan akompaña husi autoridade lokál, ekipa SETOU, diretór munisipál no abitante hetan seguransa másimu husi Polísia Nasionál Timor Lestr (PNTL) munisípiu Vikeke.
Jornaista : Vitorino Lopes da Costa
Editór : Cancio Ximenes
