BONONARU,08 Abríl 2025 (TATOLI)- Benifisiáriu sira iha suku Kolimau, Postu Administrativu Bobonaru, Munisípiu Bobonaru, klarifika katak durante ne’e Xefe Suku Kolimau, Teotónio de Carvalho Marques la ko’a subsídiu idozu no invalidés.
Benefisiáriu sira hato’o deklarasaun ne’e hodi rejeita no konsidera deklarasaun polítika husi Deputadu Bankada opozisaun FRETILIN, José da Cruz, ne’ebé levanta iha plenária segunda (07/04), dehan katak xefe suku Kolimau, ko’a osan subsídiu Idozu no invalidés ho montante $30 kada-ema ne’e la loos ka ‘Hoax”.
Notísia Relevante:Idózus no invalidés 406 iha Caraubalu simu ona subsídiu
Tanba, Benefisiáriu sira deklara loos ne’e sira-rasik deside ho konsiénsia hodi halo kontribuisaun nu’udar sarani katólika atu simu ilhas Kruz Joven no hela iha suku referidu durante loron 18.
“Ha’u ema idozu no ha’u fó $30 tanba atu halo Uma-Laku hodi simu ilhas Kruz Joven, nune’e kontribuisaun ne’e ami halo ho laran ho neon. Nune’e ami lamenta deklarasaun ita nia Deputadu José da Cruz ne’e, “Benifisiáriu idozu iha suku Kolimau, Leonel Mau Pelu da Costa Barros, ba Jornalista sira iha sede suku Kolimau,tersa ne’e
Iha biban hanesan, Benifisiáriu Miguel Loe Guterres, deklara sira simu direitu subsídiu ho osan kompletu no la ko’a direita, maibé foti ona subsídiu mak nia parte rasik fó $30 ba Xefe suku.
“Ha’u sente deputadu ko’alia dehan xefe suku Kolimau ko’a osan $30 ne’e la loos ida tanba osan ne’e banku lori direita selu mai ami ida-idak nia liman no ami mak fó fali ba $30 ba Xefe Suku, ida-ne’e kontribuisaun ami nia se hakarak hatene loloos ne’e mai to’o iha baze lai depois mak bele fó sai iha média”, Benefisiáriu ne’e lamenta.
Entretantu, Benefisáriu, Joana Soares Mau-Siga, konsidera deklarasaun membru Parlamentu ne’e nakonu ho tendénsia politika tanba foti Informasaun husi fonte ne’ebé la kredivél no laiha faktu.
Tanba, osan ne’ebé sira deside kontribui tanba hanesan fi’ar katóliku hakarak fó susesu ba vizitasaun Illas kruz joven mai suku Kolimau.
“Sira enkontru ho ami hafoin ami halo kontribuisaun hodi simu Kruz Joven, nune’e ami feto-mane, ki’ik-bo’ot, ferik-katuas organiza malu mak aterru estrada, halo uma laku, ne’e ami kontribui atu servisu tenke han no hemu”, Benefisiáriu Joana esplika.
Komunidade Vitór Magallaes, afirma kontribuisaun ne’e la’ós deit husi idozu sira, maibé husi mós komunidade, Veteranu, funsionáriu,emprezáriu sira husi suku.
“Osan $30 ne’e la’ós tur-tur ami nia liurai, ami nia pesoál suku,sira mak ezije husu de’it laiha,maibé ami halo enkontru iha sede suku ne’e, ida ne’e la’ós atu kontribui ba ami nia xefe suku ho delegadu no delegada la’e, osan kontribuisaun ida-ne’e atu simu Illas Kruz Joven nia,” nia afirma.
Xefe aldeia Manu-Nia, suku Kolimau, Fidelio de Jesús, reforsa deklarasaun deputadu José da Cruz, dehan xefe suku Kolimau ko’a osan Idozu $30 sein justifikasaun ne’e no la tuir o realidade ne’ebé akontese iha terrenu.
“Atu deklara deit katak kontribuisaun ne’ebé ami nia Inan-aman sira halo atu kontribui ba preparasaun simu Kruz Joven ne’ebé vizita ami nia suku, la’ós tur-tur mak ami nia xefe suku ko’a ne’e la’e,maibé sira kontribui ba ami nia suku durante loron 18”, nia afirma.
Alende ne’e, Prezidente Komisaun Organizadora ba vizita Krus Joven iha suku Kolimau, Adelino Barros Amaral, hatutan osan ne’e komunidade sira oferese liuhusi desizaun koletivu no bazeia konsiénsia ema ida-idak nia la’ós obrigatóriu.
“Iha momentu ne’ebá mosu reuníaun iha 04 janeiru, autoridade lokál tantu funsionáriu públiku sira, veteranu, emprezáriu no inan-aman sira hotu. Ami deside halo ezersisiu hodi hetan fundu ho dalan kontribuisaun, maibé la signifika inan-aman, kada familia,tenke hatama,maibé kontribui pur konsiénsia”, nia afirma.
Xefe Suku rejeita ko’a subsídiu
Xefe suku Kolimau, Teotónio de Carvalho Marqués, mós deklara nia parte la ko’a subsídiu idozu no invalidés tanba pagamentu pensaun mensál ne’e halo direita husi Banku Nasionál Komérsiu Timor-Leste (BNCTL) akompañadu Institutu Nasionál Seguransa Sosiál (INSS).
“Fundu hirak ne’ebé Komisaun hetan hodi jere ba atividade lima hansan Konstrusaun uma laku ho medida 6×5 (Cor Lantai) fatin ba illas Krus Joven, gastu ba konsumu durante preparasaun fatin Krus Joven hahú husi loron 19 fulan dezembru 2024 to’o 5 fevereiru 2025.
Alende ne’e kompra sasan ba vizitasaun illas Krus Joven, prepara hahán ba sarani sira husi suku Kolimau no suku viziñu hanesan Atara, Mali-Ubu, Mota-bo’ot no seluk tan iha loron vizitasaun no ikus liu prepara ai-han ba sarani sira durante loron 18.
“Tanba ne’e, liuhusi konferénsia ida ne’e ami nu’udar autoridade suku kolimau ho komunidade suku Kolimau lamenta ho deklarasaun Deputadu José Da Cruz ne’ebé foti kestaun iha plenária ho fonte informasaun ne’ebé la loos ka falsu hodi dezfama autoridade suku Colimau no povo tomak suku Kolimau nia naran”, autoridade lokál ne’e lamenta.
Tanba, nia dehan komunidade suku referida halo kontribuisaun ho konsiénsia hanesan sarani katólika hodi simu Illas Kruz Joven.
“Ami prontu atu fó justifikasaun ba buat ne’ebé sai polémika iha ami nia suku-laran se senór la satizfas ho ami nia deklarasaun ne’e, senór deputadu bele tun mai, ami prontu atu entrega dokumentu sira”, nia promote.
Enkuantu Liu husi desizaun koletivu ne’ebé deside iha enkontru fulan hirak liubá ho nia tabele osan kada familia kontribui $5, família ne’ebé iha Maliana no Munisípiu seluk $10, Veteranu $10, Funsionáriu Públiku $20, Idozu $30, Kargu Xefia $40, Funsionáriu Munisípiu no Nasionál $50, emprezáriu $100 no trabalhador iha diáspora $100.
Notisia Relevante:PR promulga alterasaun dekretu-lei subsídiu apoiu ba idozu no invalidés
Jornalista: Sergio da Cruz
Editór: Florencio Miranda Ximenes
