DILI, 07 Abríl 2025 (TATOLI)—Kadáver ex-Embaixadora Timor-Leste ba Vietname, Maria Olandina Isabel Caeiro Alves, segunda ne’e, haloot ona iha Jardim dos Herois da Pátria, Metinaro, Dili.
Mate isin ex-Embaixadora Timor-Leste ba Vietname, to’o iha Timor-Leste iha loron 5 Abríl 2025, ho Aero Dili.
Molok haloot iha Jardim dos Herois Metinaro, hala’o misa requiem iha Igreja Parókia Imaculada da Conceição ka Katedrál Dili.
Hafoin ne’e, tranzlada bá Ministériu Negósiu Estranjeiru no Kooperasaun (MNEC-sigla pottugés) hodi hetan presta omenajen ikus, depois kontinua bá Sede Komité Sentrál FRETILIN Komoro no ikus iha Komisaun Funsaun Públika (KFP), Matadouru.
Eis Embaixadora Timor-Leste iha Vietnam ne’e hakotu iis iha segunda (31/03), tuku 00:09 oras lokál, ho idade 69, iha Ospitál Sentru Médiku Prince Court, Malázia, tanba moras kankru.
Notísia relevante: Olandina Caeiro nia mate-isin to’o ona Timor-Leste
Maria Olandina Caeiro moris iha 20 Marsu 1956, iha Ermera. Aleinde nu’udár diplomata, nia mós nu’udár ativista, funsionária públika no emprezária.
Durante nia moris, ex-Embaixadora ne’e envolve iha organizasaun oinoin ne’ebé luta ba libertasaun nasionál, inklui harii Organizasaun Feto Timor Kontra Violénsia no hala’o knaar nu’udár Vise-Prezidente Unidade Eskuteiru Timor-Leste.
Jornalista: Felicidade Ximenes
Editór: Xisto Freitas da Piedade
