VIKEKE, 08 Abríl 2025 (TATOLI)–Ekipa husi Sekretaria Estadu Dezenvolvimentu Lokál (SEDL), tersa ne’e, realiza avaliasaun ba serbisu autoridade munisípiu no postu administrativu sira iha munisípiu Vikeke.
Iha avaliasaun ne’e, Reprezentante SEDL no atuál Diretór Jerál Dezenvolvimentu Lokál, Virgílio da Costa, hateten, avaliasaun ne’e atu garante funsionamentu servisu administrasaun iha munisípiu Vikeke tanba presiza iha asistente tékniku ida husi diresaun nasionál ba promosaun efisiénsia administrasaun lokál.
“Estudu ida-ne’e ho objetivu atu haree ba funsionamentu administrasaun públika hahú husi autoridade no servisu munisipál sira to’o iha postu administrativu sira. Tanba ne’e, ohin ami mai halo avaliasaun iha munisípiu Vikeke hodi haree direta serbisu sira iha terrenu oinsá atu jere administasaun sira-ne’e iha kualidade ka la kualiade,” Virgílio da Costa, hateten iha salaun administrasaun Vikeke.
Nia dehan, atu hakat ba poder lokál no desentralizasaun presiza garante ba administrasaun ida ne’ebé di’ak no ninia funsionamentu di’ak to’o baze.
“Ita ba poder lokál presiza administrasaun no funsionamentu diak. Tanba ita hatene katak rekursu umanu ne’ebé ita koloka adekuadu. Governu sentrál oferese ona kompeténsia tolu hanesan administasaun, autonomia finanseira no patrimóniu própriu ba munisípiu sira. Nune’e, ami-nia kompeténsia mak halo estudu ba kompeténsia tolu ne’ebé atribui ba munisípiu sira bele implementa ho di’ak ka lae. Se di’ak ona ba tinan 2026 ita sei halo avaliasaun ba kondisaun mínima sira,” nia akresenta.
Notísia relevante : SEDL husu líder lokál kontrola komunidade labele konstrui uma iha fatin risku
Ekipa halo avaliasaun ba autoridade, diretór munisipál sira hotu no aban sei kontinua bá vizita postu administrativu sira.
Iha biban ne’e, Prezidente Autoridade munisípiu Vikeke, Francisco C.S de Gonzaga Soares, husu ba diretór munisipál no xefe departamentu sira atu partisipa másimu ba avaliasaun sira-ne’e hodi bele kompreende materiál sira-ne’ebé ekipa SEDL partilla.
“Liu-liu ba kompeténsia sira-ne’ebé oferese ona ba ita, liuhusi dekretu lei nú 84/2023. Tanba ne’e, ita atu hakat ba dezentralizasaun poder lokál, diresaun sira hala’o funsionál ho di’ak to’o iha baze. Tanba ne’e, agradese ba ekipa SEDL mai munisípiu Vikeke hodi haree serbisu sira,” Autoridade ne’e hato’o.
Deklara tuir alterasaun dekretu-lei nú 3/2016, ne’ebé públika filafali hanesan iha dekretu-lei nú 84/2023, katak autoridade munisípiu sira kompeténsia propriu iha área finanseiru, administrativu, no lojístiku, kompeténsia polítika sei iha Ministériu Administrasaun Estatál (MAE).
Reforma legál ida-ne’e marka pasu signifikativu ida iha prosesu desentralizasaun hodi reforsa autonomia administrasaun munisipál sira no hasa’e estrutura governasaun lokál nian.
Avaliasaun ne’e hetan partisipa husi sekretáriu munisípiu Vikeke, diretór munisipál, administradór postu lima, diretór liña ministeriál, xefe departamentu munisípiu no funisionáriu sira.
Jornalista : Vitorino Lopes da Costa
Editora : Julia Chatarina
