DILI, 08 Abríl 2025 (TATOLI)-Governu liuhusi Fundu Dezenvolvimentu Kapitál Umanu (FDCH-sigla portugés) sei oferese bolsa ba ema-374 hodi kontinua estudu lisensiatura iha rai-li’ur.
“Númeru ne’e ita prepara ba tinan-ne’e, maibé ita mós hein ba anu letivu ema-nian”, Diretór Ezekutivu FDCH, Júlio Aparício, dehan ba TATOLI iha nia knaar fatin Kolmera, tersa ne’e.
Nia dehan tan, FDCH sei koopera uluk ho Indonézia tanba sira-nia anu letivu iha fulan-Jullu. “Indonézia ne’e ami servisu hamutuk ho Akademi Teknik Mesin Industri, semana oin ami loke ona”.
Nia hatutan, FDCH konvida ona reitór ho nia dosente sira ne’ebé sei to’o Timor iha loron 20 fulan ne’e. Hodi halo selesaun ba ema-15 ne’ebé estudu iha ne’ebá. ATMI ne’e eskola padre Jesuita sira-nia, eskola ne’ebé iha nia kualidade di’ak tanba 70% prátika no 30% teoria.
Diretór Ezekutivu FDCH hatete, nasaun ne’ebé bolseiru sei estudu bá mak Indonézia Malázia, Kuba, Brazil, Portugál, Tailándia. Sira-ne’e ba foti área indústria, IT, direitu, turizmu, ospitalidade, saúde, agrikultura no seluk tan.
Bolsu foun ba tinan ne’e hamutuk 374, bolsa parsiál públika jerál iha 55, estájiu profesionál ba graduadu ba bolsa FDCH iha 20, bolsa ba F-FDTL iha lima, bolsa ba funsionáriu públiku 32 no bolsu ba públiku jerál hamutuk 262.
Totál bolseiru ne’ebé ezistente to’o 2024 ne’e hamutuk 4.830 ho nia totál osan $13.956.821. Hosi númeru 4.830 ne’e inklui ho bolsa parsiál sira.
FDCH nia proposta orsamentu ba tinan 2025 hamutuk $18.973.544, ne’ebé mak sei finansia ba atividade 51, iha programa prinsipál haat mak hanesan formasaun profisionál ho nia orsamentu $1.223.780 ne’ebé sei finansia atividade tolu, formasaun téknika ho nia orsamentu $2.051.682 sei finansia atividade 16, bolsa estudu ho nia orsamentu $13.956.821 sei finansia ba atividade 30 no funsionamentu no dezenvolvimentu institusionál ho nia orsamentu $1.741.261 sei finansia ba atividade rua.
Notísia relevante: FDCH asina MoU ho universidade lima iha Indonézia
Jornalista : Osória Marques
Editora : Rita Almeida
