DILI, 06 Marsu 2025 (TATOLI)-Fundu Dezenvolvimentu Kapitál Umanu (FDCH-sigla portugés), asina nota entendimentu (MoU-sigla inglés) ho Reitór hosi Universidade lima iha Indonézia.
Tuir nota komunikadu ne’ebé TATOLI simu haktuir selebrasaun akordu ne’e akompaña husi Ministru Ensinu Superiór Siénsia no Kultura, José Honório Pereira Jerónimo, Embaixadór Timor-Leste ba Indonézia, Roberto Sarmento de Oliveira Soares, no diplomata sira iha Embaixada Timor-Leste nian iha Indonézia.
Diretór Ezekutivu FDCH, Júlio Aparício, hatete memorandu ne’ebé halo mak ho Universidade Gadjah Mada (UGM), Universidade Katólika Atma Jaya, Universidade Mercu Buana, Universidade Borobudur no Politeknik ATMI Surakarta.
Notísia relevante: PR Horta apresia Universidade Katólika Atma Jaya fasilita timoroan ba estudu iha Indonézia
José Honório Pereira Jerónimo hatete entendimentu ne’ebé estabelese nu’udar apoiu ida husi universidade lima ba Timor-Leste, no mós xave hasa’e sistema edukasaun ensinu superiór atu prepara jerasaun foun sira ba dezenvolvimentu rekursu umanu ne’ebé sustentável.
Embaixadór Timor-Leste ba Indonézia, Roberto Sarmento de Oliveira Soares, hateten ohin marka momentu importante ba ensinu superiór.
“Ita-nia kompromisu hamutuk atu avansa iha edukasaun, promove dezenvolvimentu rekursu umanu no hametin relasaun entre ita-nia instituisaun sira no Governu Timor Leste ho Indonézia. Kolaborasaun ne’ebé ohin ita asiste la’ós de’it signifika parseria entre instituisaun rua, maibé mós aliñamentu vizaun ida ne’ebé fahe ba futuru ida ne’ebé nabilan liu ba povu Timor-Leste”, nia dehan.
FDCH hala’o ona knaar importante ida hodi hasa’e asesu ba edukasionál sira no hodi halo parseria ho universidade iha ne’e.
“Ohin, ami iha konfiansa katak ami sei hadi’a liután kualidade edukasaun no kria dalan ida ba foinsa’e sira atu sai líder futuru nasaun Timor-Leste nian”, konklui.
Notísia relevante: FDCH sujere ME atensaun ba ESJ hodi kompete iha bolsa estudu
Jornalista : Osória Marques
Editora : Rita Almeida
