DILI, 08 Abríl 2025 (TATOLI)-Fundu Dezenvolvimentu Kapitál Umanu (FDCH, sigla portugés) ho Universidade Nasionál Timor Lorosa’e (UNTL) fahe responsabilidade selu dosente Kubanu nain neen ne’ebé hanorin iha UNTL. 
Diretór Ezekutivu FDCH, Júlio Aparício, esplika parte FDCH sei selu husi fulan-Janeiru to’o Jullu 2025, enkuantu fulan sira restu husi 2025 sei selu husi parte UNTL.
“Ami koordena no diside, FDCH selu husi Janeiru to’o Jullu (fulan hitu) no UNTL responsabiliza husi Agustu to’o Dezembru (fulan lima)”, dehan nia ba TATOLI iha ninia knaar fatin Kolmera, ohin.
Nia hatutan: “Antes ne’e FDCH selu ona husi Maiu to’o 31 Dezembru 2024, hamutuk $139.200. Maske ami-nia programa ba ida-ne’e laiha, maibé FDCH tenke kua orsamentu balun husi bolsa nian, projetu no formasaun hodi selu fali ida-ne’e”.
Nia haktuir momentu ne’ebá kedas FDCH asina akordu ida katak tama ba tinan 2025 ne’e UNTL mak responsabiliza, nune’e FDCH la prevee orsamentu, maibé orsamentu ba UNTL la passa iha Komité Revizaun Orsamentu, entaun osan la too atu selu ba dosente nain-neen ne’e.
Tanba situasaun ne’e to’o iha Primeiru-Ministru, nia dehan Ministru Ensinu Superiór no Kultura (MESSK) no mós Ministru Planeamentu Investimentu Estratéjiku (MPIE) simu orientasaun liuhusi Konsellu Ministru hodi hasai osan iha FDCH, nune’e bele selu saláriu ba dosente nain-neen.
“Entaun iha loron 01 Abríl bainhira ami enkontru ho MPIE no MESSK membru Konsellu Administrasaun FDCH deside katak FDCH tenke koordena hamutuk ho UNTL rezolve problema ida-ne’e, tanba ida-ne’e problema entre nasaun Kuba ho Timor-Leste”, dehan.
Júlio Aparício realsa UNTL tenke esforsu hodi kua sira-nia programa balun hodi selu.
Nia haktuir iha tinan 2024 dosente Kubanu ne’ebé hanorin iha UNTL ne’e remata. UNTL osan laiha atu selu. Entaun UNTL halo karta ida ba Vise Primeiru Ministru, Ministru Planeamentu Estratejiku hodi koordena no halo akordu hamutuk hodi solusiona asuntu ne’e. Tanba dosente ne’e nia kontratu remata iha Abríl 2024. Ida-ne’e akontese iha mandatu uluk sei Sekretáriu Estadu Juventude no Desportu nian ho UNTL nia kooperasaun depois mai fali ho Ministériu Juventude Desportu no Kultura nian ne’ebé labele selu dosente sira-ne’e.
Notísia relevante: FDCH asina akordu ho UNTL hodi kontratu profesór kubanu na’in-neen
Jornalista : Osória Marques
Editora : Rita Almeida
