DILI, 08 Abríl 2025 (TATOLI)-Governu liuhusi Ministériu Solidariedade Sosiál no Inkluzaun (MSSI), ho Institutu Nasionál Seguransa Sosiál (INSS), ne’ebé partisipa hosi Primeiru-Ministru (PM), Kay Rala Xanana Gusmão, tersa ne’e lansa mobile APP iha salaun multiuzu GMN, Bebora.
Prezidente Konsellu Administrasaun INSS, Arlindo Pinto, hatete aplikasaun ne’e atu hakbesik ba sidadaun hotu ho maneira simples no fasil liu.
“Aplikasaun ne’e atu proteje sidadaun hotu-hotu hodi garante bem-estar. Tanba seguransa sosiál proteje ita-nia moris liuhusi subsídiu maternidade, paternidade, prestasaun sobrevivensia, inklui pensaun reforma”, katak nia.
Nia reforsa kompromisiu boot hosi Konsellu Administrasaun INSS no MSSI mak halo jestaun finanseira ida ne’ebé transparansia, efikasia, efisiensia liuhusi Jestaun Fundu Rezerva Seguransa Sosiál.
Iha tinan hirak liubá, liuhusi INSS konsege lansa kartaun seguransa sosiál nian ba sidadaun hotu-hotu ne’ebé durante ne’e kontribui ba seguransa sosiál. Nune’e, liuhusi taxa kontribuisaun ne’ebé traballadór no empregadór kontribui. Traballador kontribui 4% no empregadór 6%. Alende ne’e hadi’a prestasaun servisu ba seguransa sosiál iha rejime naun-kontributivu.
“Ita konsege muda mekanizmu sistema pagamentu, liu-liu ba ita-nia ferik-katuas, ne’ebé agora besik liu no halo pagamentu iha nível suku sira, ne’ebé simu fulan tolu-tolu, ohin ita halo lansamentu sistema mobile APP nu’udar ferramenta dijitalizasaun ne’ebé sei tulun traballadór hotu-hotu. Aplikasaun ne’e hafasil traballadór hotu-hotu ne’ebé durante ne’e ladún hatene nia prosesu kontribuisaun. Ita hetan apontamentu barak liuhosi setór privadu no setór públika sira oinsá ita desimina informasaun kona-ba lei númeru 12/2016, ne’ebé ko’alia kona-ba rejime kontributivu seguransa sosiál nian ba sidadaun hotu”, dehan.
Nia hatuta: “Seguransa sosiál halo levantamentu desde kontribuisaun 2017 to’o iha tinan 2022, ita-nia kapitál iha miliaun $150, ne’ebé konsentra iha Banku Sentrál. Depois iha tinan 2023 ita halo levantamentu husi Fundu Rezerva Seguransa Sosiál mai iha konta propria Fundu Rezerva Seguransa Sosiál nian ne’ebé durante ita aplika iha merkadu finanseiru, ne’ebé husi ita-nia kapitál miliaun $150, agora ne’e foin mak halo tinan ida ho balun, maibé iha aumenta millaun $254”.
“Kapitál Fundu Rezerva Seguransa Sosiál fizikamente, agora iha movimentu merkadu finanseiru hamutuk miliaun $233, ne’ebé durante ne’e ita aplika iha depozita prazu. Nia provizoens reseita entre miliaun $100 to’o miliaun $12 kada tinan. Ida-ne’e planu atu uza hodi halo jestaun ativu ba ita-nia Fundu Rezerva Seguransa Sosiál hodi halo Investimentu iha rai laran no esteriór”, informa.
Primeiru Ministru (PM), Kay Rala Xanana, hatete lansamentu ba aplikasaun APP INSS ne’ebé halo ne’e atu hakbesik-an liuba ema ida-idak, liu-liu ba servisu instituisaun públiku no instituisaun privadu sira.
“Loos duni loron ohin ne’e importante-ida, liu-liu ba hirak ne’ebe kontribui ba seguransa sosiál ba nia-an rasik. Ida ne’e forma ne’ebe ita-halo prestasaun servisu hakbesik-an liu ba ema ida-idak traballadór sira institutu publiku no servisu privadu sira bele garantia. Sira nia futuru hetan aprezentasaun sai servisu, ne’e duni”, katak nia.
“Ha’u husu ba ita-boot sira ita halo lansamentu sei aprezenta mai buat ne’ebe ha’u la hatene atu ko’alia. Obrigadu ba ita-boot sira hotu bele mai iha-ne’e ho ita-boot sira-nia prezensa fó konfiansa boot ba traballadór sira iha Institutu Públiku no setor privadu”, PM dehan.
Notísia relevante: INSS hein dadus funsionáriu reformadu husi KFP
Jornalista : Osória Marques
Editora : Rita Almeida
