DILI, 08 Abríl 2025 (TATOLI) – Diretór-Ezekutivu Centro Nacional Chega! Institutu Públiku (CNC, I.P), Hugo Maria Fernandes, hateten progresu konstrusaun edifísiu sentru arkivu foun CNC daudaun atinje 50%.
Nia hatutan katak fulan ida-ne’e nia rohan empreza sei finaliza edifísiu nia basement no bainhira ida-ne’e ramata sei foku ba konstrusaun edifísiu nian.
“Tuir planu, konstrusaun sei finaliza iha Setembru fulan ne’e”, Hugo Maria Fernandes ba TATOLI, ohin.
Nia dehan sentru arkivu foun ne’e rasik nia basement ne’e sei uza ba salaun enkontru no rai dokumentu sira.
Antes ne’e, Diretór-Ezekutivu CNC dehan estabelesimentu sentru arkivu ne’e atu akumula dokumentu hotu ne’ebé daudaun ne’e rai hela iha sentru arkivu ne’ebé utiliza hela antiga Komarka Balide.
“Ita iha dokumentu rihun 50-resin, arkivu istóriku neʼebé liga ho dokumentu sira no atu violasaun direitu humanu ne’ebé komete husi militár indonéziu sira, nomós husi ita timoroan, hahú husi períodu 1974 to’o 1999”, dehan.
Aleinde prezerva, CNC mós iha polítika kona-ba kolesaun mak oinsá bele halibur tan dokumentu sira seluk, tanba dokumentu ne’ebé daudaun ne’e iha CNC ladún kompletu, entaun presiza tan dokumentu sira seluk.
Lembra katak konstrusaun ba edifísiu arkivu foun CNC halo kooperasaun ho Ministériu Planeamentu no Investimentu Estratéjiku no Sekretariadu Grande Projetu (SGP) hodi harii edifisiu foun ne’e ho kustu $941.103,73 no toma konta husi empreza nasionál rua neʼebé halo konsórsiu hanesan Nazareth Unipessoal Lda. hamutuk ho Quatro Colegas Lda.
Notísia relevante: Ekipa traballu halo diskusaun ba dezenvolvimentu sentru arkivu CNC, I.P
Jornalista: Arminda Fonseca
Editora: Maria Auxiliadora
