PN hato’o votu pezár ba falesimentu Olandina Caeiro ho unanimidade
DILI, 08 Abríl 2025 (TATOLI)–Parlamentu Nasionál (PN) liuhusi reuniaun plenária, tersa ne’e, aprova votu pezár ba falesimentu Maria Olandina Isabel Caeiro Alves.
“Rezultadu votasaun afavór 55, kontra 0 no abstensaun 0 (ne’ebé votu pezár aprovadu),” Prezidente Parlamentu Nasionál (PPN), Maria Fernanda Lay, fó sai iha sala plenária, tersa ne’e.
Segundu Sekretártia Meza, Bendita Monis Magno, lee sai testu votu númeru 4/2025 pezár ba falesimentu Maria Olandina Isabel Caeiro Alves ne’ebé hakotu iis iha loron 31 Marsu 2025 iha Malázia ho idade 74. Saudoza moris iha Ermera oan husi Fernando Caeiro Alves no Isabel Salsinha.
Maria Olandina Caeiro nu’udar lutadora inkansável husi kauza indepedénsia nasionál, no partisipa iha momentu istóriku iha luta libertasaun nasionál.
Iha tinan 1975 saudoza hola parte iha estrutura Komité Sentrál FRETILIN nomeadu hanesan Vise-Sekretária Edukasaun no Kultura. Iha tinan hanesan saudoza funda mós ho kompatriota sira seluk hanesan Organizasaun Populár Feto Timor (OPMT, sigla portugés) no Uniaun Nasionál Ajente Ensinu Primáriu Timor (UNAEPTIM), nune’e mós hanesan fundadora Rádiu Maubere, asume mós funsaun hanesan lokutora.
Notísia relevante : Olandina Caeiro nia mate-isin to’o ona Timor-Leste
Hafoin libertasaun nasionál no restaurasaun indepedénsia, Timor-Leste asume kargu públiku oinoin, hanesan Prezidente Komisaun Funsaun Públika, Prezidente Rede Feto no Komisária Komisaun Funsaun Públika no ezerse funsaun iha konsuladu jerál Timor-Leste iha Denpansar -Indonézia, iha 2017 asume kargu Embaxadora Timor-Leste iha Malázia no tinan 2021-2024 asume nu’udar Embaxadora Timor-Leste iha Vietname.
Ba dedikasaun Maria Olandina Isabel Caeiro Alves, durante vida inteira, luta ba libertasaun nasionál Timor-Leste, PN reuni iha sesaun plenária espresa ninia profundu pezár ba saudoza ninia falesimentu, enderesa sentida kondolénsia ba ninia família no amigu enlutada.
Votu pezár ne’e aprezenta husi Deputadu proponente Maria Angelina Sarmento Lopes (PLP), Durate Nunes (CNRT) no Luís Roberto (KHUNTO).
Deputada Maria Angelina Lopes, hateten saudoza merese duni atu PN atu fó omenajen ho votu pezár ne’e tanba hanesan feto dedikadu tebes ba luta libertasaun pátria no eventu importante ne’ebé kontribui ba prosesu sira.
Deputada ne’e hato’o sentidu kondolénsia ba família no husu Ministériu Asuntu Kombatente Libertasaun Nasionál atubele haree fali nia kontribuisaun no dedikasaun.
Deputadu Duarte Nunes (CNRT), fó sasin katak saudoza hamutuk ho kompañeiru sira seluk ninia kontribuisaun hahú tinan 1975 la’o hamutuk ho Komandante Ein-Xefe Kay Rala Xanana Gusmão ba iha fronteira Bobonaro.
“Ita espera nia memória hela nafatin iha ita-nia istória. Lori militante partidu no kolega Deputadu husi bankada, hato’o ami-nia sentidu kondolénsia ba família ein lutada, espera ho Maromak nia bensaun sira-nia oan no beioan bele iha kbiit atu simu todan ida-ne’e,” Xefe Bankada CNRT ne’e hato’o.
Deputadu Luís Roberto (KHUNTO) konsidera saudoza nu’udár jerasaun foun no inan-feton ne’ebé brani hola parte iha luta libertasaun.
“Hakarak husu Governu atubele rekoñese ita-nia inan-feto nia luta no fó valorizasaun ba nia no oan kia’k sira ne’ebé iha,” nia hato’o.
Deputada FRETILIN, Lídia Norberta, dehan, saudoza hanesan inan ida ne’ebé luta boot tebes, nia la’ós kombatente de’it maibé eroina ne’ebé hamutuk ho saudozu no saudoza ne’ebé agora laiha ona hodi hahú luta ba emansipasaun feto.
Xefe Bankada PD, Manuel Henrique Noronha, lori bankada nia naran hato’o profundu kondolénsia ba família enlutada.
Jornalista : Nelson de Sousa
Editora : Julia Chatarina
