VIKEKE, 08 Abríl 2025 (TATOLI)—Servisu Agrikultura, Peska, Pekuária no Floresta (SMAPPF) munisípiu Vikeke konsege loke natar potensiál hamutuk ektare 2.347 iha trimestre dahuluk tinan 2025.
“Iha trimestre dahuluk ne’e ami konsege funsiona natar potensiál hamutuk ektare 2.347 ne’ebé abandona durante tinan barak. Natar sira-ne’e lokaliza iha área hamutuk 21, iha Iralaer Uatulari, Uaimori, suku Bibileo no Uatukarbau,” Diretór Servisu Agrikultura, Peska, Pekuária no Floresta, Olívio Freitas Soares, informa iha salaun administrasaun Vikeke, tersa ne’e.
Nia dehan, natar ne’e abandona durante tinan barak tanba irrigasaun a’at, nune’e husi fulan-Janeiru to’o Marsu SMAPPF oferese eskavatór ba atu normaliza irrigasaun.
“Ida-ne’e mak ita-nia progresu serbisu agrikultura iha munisípiu Vikeke, daudaun ita kontinua apoia eskavatór no tratór boot hodi tetu kabu sira. Tanba natar sira-ne’e abandona tinan naruk nune’e kabu laiha,” nia relata.
Notísia relevante : MAPPF apoia agrikultór tetu natar foun ektare 156 iha Uatulari
SMAPPF Vikeke reativa filafali natar potensiál sira-ne’ebé abandona hodi agrikultór sira bele hasa’e produsaun hare iha munisípiu Vikeke.
Husi natar ektare 2.347, agrikultór sira daudaun ne’e hala’o atividade agrikultura iha natar Bibileo ektare 85 hodi kuda hare, natar Hae-Oli ektare 45 ne’ebé daudaun ne’e agrikultór sira kari ona, enkuantu natar iha área Uaimori hamutuk ektare 128 daudaun ne’e iha faze kuda ona.
“Natar ektare 50 iha suku Uaibobu, postu Ossu ne’ebé uza sistema irrigasaun Gaelata, daudaun ne’e ita-nia agrikultór sira kuda hotu ona,” nia tenik.
Jornalista : Vitorino Lopes da Costa
Editora : Julia Chatarina
