DILI, 08 Abríl 2025 (TATOLI)-Unidade Kardiolojia Ospitál Nasionál Guido Valadares (HNGV, sigla portugés) hamutuk ho Xefe Ezekutivu husi Fundu ba Fuan iha Timor-Leste (TLHF, sigla inglés), hasoru Prezidente Repúblika, José Ramos Horta, iha Palásiu Prezidensiál Bairru Pité, ohin.
Durante hasoru malu, Xefe Unidade Kardiolojia, dr. Herculano do Santos, akompaña husi Xefe Ezekutivu TLHF (Timor-Leste Heart Fund), June Williams, informa servisu hamutuk ne’ebé parte rua ne’e halo liga ho moras-fuan ba Xefe Estadu, José Ramos Horta.
Herculado do Santos ba jornalista sira hatete, programa no apoiu ne’ebé HNGV simu husi parte TLHF mak detesaun sedu, prevensaun no tratamentu ba timoroan sia ne’ebé sofre moras-fuan no sirurjia ne’ebé TLHF halo iha Austrália.
“Kazu sira ne’ebé mak deteta iha ne’e, transfere bá Austrália no Timor-Leste Hearts Fund kontinua fó apoiu ba sira-nia tratamentu iha ne’ebá, balun konsege halo tratamentu intensivu no mós balun halo operasaun fuan, liu-liu ba labarik sira ne’ebé moris mai ho problema fuan”, katak kardiolojista ne’e hafoin hasoru Prezidente Repúblika.
Nia hatete, tinan kotuk to’o mai agora TLHF loke tan sira-nia espasu atu fó apoiu ba formasaun rekursu umanu, no sira finaliza ona planu dezenvolvimentu rekursu umanu iha área kardiolojia, liuliu konaba treinamentu no formasaun kontinua ba infermeiru sira ne’ebé servisu ba área kardiolojia.
Apoiu seluk, nia dehan TLHF apoiu ekipamentu hanesan doasaun ba mákina ekokardiografia no seluk. “Ita espera katak ho apoiu ne’e kontinua presta servisu di’ak liután iha área kardiolojia ba populasaun”, dehan.
June Williams hatete kontente no apresia ho momentu ne’e, tanba aproveita informa sira-nia planu workshop liga ho saúde fuan ne’ebé sei realiza iha semana-ne’e.
Nia dehan Xefe Estadu apresia no kompromete kontinua apoiu programa sira ne’ebé halo husi THFH.
Notísia relevante: Ema ne’ebé mate derepente maioria moras fuan
Jornalista : Osória Marques
Editora : Rita Almeida
