KOVALIMA, 09 Abríl 2025 (TATOLI) – Ministériu Dezenvolvimentu Rurál no Abitasaun Komunitária (MDRAK), identifika aldeia 10, sai alvu implementa programa revitalizaun komunitária, iha munisípiu Kovalima.
Diretór jerál dezenvolvimentu rurál, Filipe Cardoso, esplika, ezisténsia Ministériu dezenvolvimentu rurál no abitasaun komunitáriu foin estabelese iha mandatu IX Governu konstituisionál ne’ebé área temátiku konsentra ba iha área rurál ho intensaun atu promove no dezenvolve área rurál.
Ho nune’e define servisu ba dirasaun jerál dezenvolvimentu rurál no hodi define tan programa ho naran revitalizasaun komunitária prevee Orsamentu Jerál Estadu (OJE) liuhusi transferénsia públika hamutuk millaun 3.5 husi orsamentu ne’e, identifika aldeia 70 iha territóriu mak sai alvu ba programa Governu nian.
“Aldeia 70 ne’ebé mak identifika atu implementa progama referida, maibé iha Kovalima identifika aldeia 10 mak sai alvu implementa programa husi Governu tanba bazeia ba kapasidade orsamentu”, Filipe Cardoso, informa ba jornalista sira, iha salaun CNE Tabakolok, ohin.
Aldeia 10 ne’ebé sai alvu ne’e, Governu apoia orsamentu mai iha Kovalima hamutuk rihun $ 410, ne’ebé kada aldeia balun hetan orsamentu rihun $ 40 no balun rihun $ 50 atu finansia sira-nia atividade.
Orsamentu ne’ebé mak fó apoia transfere direta ba kada aldeia alvu sira atu finansia atividade ne’ebé mak grupu prioritiza liga ba potensiál definidu hanesan aldeia balun poténsia ba peska, agrikultura, ortikultura no pekuária.
Ezekutivu ne’e esplika, mekanizku apoiu orsamentu atu finansia grupu molok ne’e hala’o uluk sensibilizasaun, estabelese sentru dezenvolvimentu aldeia ema na’in-hitu idaidak hala’o nia funsaun hodi hala’o planu ba grupu alvu define atividade no mellora.
Ho prioridade ne’ebé define ekipa verifikasaun no avaliasaun haree sira-nia proposta elijivél maka aprova grupu atu hetan apoiu fundu husi ministériu.
Tuir dadus aldeia 10 ne’ebé implementa programa abilitasaun komunitária ne’e, estabelese ona grupu 46 ne’ebé klasifika hala’o atividade ba setór sira hanesan pekúaria, peska; tasi no rai maran, ho atividade agrikultura.
Notísia relevante:Benefisiáriu-estrutura SDA partisipa formasaun tipu rua iha Kovalima
Jornalista: Celestina Teles
Editór: Rafael Ximenes de A Belo
