OEKUSI, 09 Abríl 2025 (TATOLI) –Iha trimestre dahuluk, husi Janeiru mai to’o Marsu 2025, ezekusaun Orsamentu Jerál Estadu (OJE) 2025 ne’ebé ezekuta husi Autoridade Rejiaun Administrativa Espesiál Oekusi Ambeno (RAEOA), lideradu Rogério Tiago Lobato, atinje ona 29%, ekivalente ho orsamentu $62.181.000.00.
“Pogresu iha konta jerál RAEOA nian, oras ne’e atinje ona 29%, loloos bele sa’e ba 35% tuir programa ne’ebé aprezenta husi Ministériu Finansa, maibé ha’u sente katak, rezultadu 29% ne’e di’ak tanba agora ita iha tarjetu katak fulan tolu ita tenke haree ezekusaun to’o iha ne’ebé, sei ita kontinua bebeik hanesan ne’e, to’o fin do ano ita bele atinje to’o 90%,” PA RAEOA ne’e hatete ba jornalista sira iha Oekusi, ohin.
Notísia relevante:RAEOA prevee millaun $62 iha OJE 2025
Husi 29% ne’e ezekuta ba programa no atividade sira iha Sekretáriu Rejionál sira hotu hamutuk inklui Gabinete Prezidente Autoridade RAEOA no Fundu Espesiál dezenvolvimentu (FED) nian hanesan ba FED mak 14% no RAEOA nian mak 15%.
Entretantu, iha proposta OJE 2025 ba RAEOA iha millaun $62, neʼebé millaun $36,001,473.00 ba autoridade RAEOA no $26,179,527 ba Fundu Espesiál Dezenvolvimentu (FED).
Alokasaun proposta OJE 2025 ba autoridade $36,001,473 ne’e, hodi aloka ba saláriu vensimentu $14,662,131.00, bens no serbisu $10,125,289.00, transferénsia públika $4,214,053.00 no kapitál dezenvolvimentu $7,000,000.00.
Tuir dokumentu livru proposta OJE Volume II: RAEOA- ZEEDOA, haktuir katak jeralmente, alokasaun orsamentu ba RAOEA-ZEEDOA ho objetivu atu kria abordajen ida-neʼebé ekilibradu ba dezenvolvimentu hodi hatán ba nesesidade imediata no perspetiva kreximentu ba tempu naruk, foku ba infraestrutura, kapitál umanu no diversifikasaun ekonómika, kombina ho esforsu atu hametin instituisaun sira no promove inkluzaun sosiál, hodi kontribui ho pozitivu ba dezenvolvimentu jerál territóriu RAEOA no ZEESM nian.
Notísia relevante:RAEOA aloka rihun $600 iha OJE 2025 hodi subsidia Aero Dili
Jornalista: Abílio Elo Nini
Editór: Florencio Miranda Ximenes
