iklan

HEADLINE, OEKUSI

RAEOA aloka rihun $600 iha OJE 2025 hodi subsidia Aero Dili

RAEOA aloka rihun $600 iha OJE 2025 hodi subsidia Aero Dili

Prezidente Autoridade Rejiaun Administrativa Espesiál Oé-Cusse Ambeno, Rogério Tiago Lobato. Imajen Tatoli/Francisco Sony

OÉ-CUSSE, 30 Outubru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) prevee rihun $600 iha transferénsia públika iha Orsamentu Jerál Estadu (OJE) 2025 hodi fó subsídiu ba empreza Aero Dili.

Prezidente Autoridade RAEOA, Rogério Tiago Lobato, hateten inisiativa ne’e atu haforsa konektividade aviaun Aero Dili bá Oé-Cusse kada semana ho vou dala-rua.

“Ita hatene ema ne’ebé lori Aero Dili mai Oé-Cusse nu’udar emprezáriu timoroan. Aviaun semo mai, ita tenke tau mina no karun tebes. Nia folin agora $1.80 kada litru, kuandu sorte di’ak nia to’o Indonézia folin mina tuun entaun enxe nakonu kedas, maibé to’o Timor-Leste atu semo bá fali fatin seluk tenke sosa mina”, Rogério Lobato dehan iha Oé-Cusse.

Notísia relevante: RAEOA prevee millaun $62 iha OJE 2025

Tuir Lobato, bainhira aviaun Aero Dili semo bá Oé-Cusse dala ida gasta rihun $12 no se semo dala-ualu kada fulan nia tenke gasta rihun $80.

“Maibé, osan ne’ebé uluk ita uza hodi selu ba aviaun ZEESM ne’e $150, aviaun ida ki’ik lori de’it ema na’in-19. Agora, ita fó subvensaun públika ba apoia emprezáriu nasionál ne’e atu nia tau aviaun ne’e kada loron ema 150 bá-mai. Ida-ne’e loke dalan ba Oé-Cusse oan hotu bele sa’e aviaun no sa’e ho folin ida-ne’ebé ki’ik”, nia adianta.

Nia kompara operasaun aviaun ZEESM uluk ho presu billete kada pasajeiru ho $50, maibé ho Aero Dili billete tuun ba $20.

“Mezmu ita selu subvensaun públika ne’e ba iha Aero Dili, ne’e ita apoia ita-nia emprezáriu nasionál ida. Depois ita la gasta osan hanesan aviaun ki’ik gasta rihun $150 kada fulan. Agora, aviaun boot ita gasta de’it rihun $50 kada fulan no subvensaun públika ne’e autoriza husi primeiru-ministru”, dehan.

Notísia relevante: Governu sei foti hosi fundu petrolífeiru billaun $1,566 aloka ba OJE 2025

Iha livru OJE 2025 nian, RAEOA prevee ba kategoria transferénsia públika ho montante $1,362.580 ka okupa 5,20% husi millaun $26 iha tinan 2025 ho objetivu atu halo transferénsia ba fatin tolu mak hanesan – Primeiru, transferénsia montante rihun $570 hodi finansia nesesidade bolseiru na’in-11 hala’o hela estudu iha estranjeiru.

Daruak, transferénsia ba Sentru Formasaun Bansone Oé-Cusse ho montante rihun $200 hodi finansia nesesidade koerrente.

Datoluk, transferénsia orsamentu ho montante rihun $600 ba Aero Dili atu aselera movimentu, liuliu ba transporte aéreu nian ka garante konektividade nasionál durante tinan 2025 no ba Airport Council International (ACI) Membership Fee.

Notísia relevante: OJE 2024: RAEOA ezekuta ona 43.13%

Jornalista: Abílio Elo Nini

Editora: Maria Auxiliadora

iklan
iklan

Leave a Reply

iklan
error: Content is protected !!