DILI, 09 Abríl 2025 (TATOLI)-Dekanu Interinu husi Fakuldade Filozofia Siénsia Umana (FFCH, sigla portugés), Univerversidade Nasionál Timor Lorosa’e (UNTL), kuarta ne’e hakotu iss iha Ospitál Nasionál Guido Valadares (HNGV-sigla portugés), hafoin realiza konferénsia nasionál ho tema “Reflesaun nasionál kona-ba tinan 50 aniversáriu proklamasaun independensia Timor-Leste”, iha auditóriu UNTL Kaikoli.
“Ida-ne’e soke boot ba UNTL, tanba lakon tan ema matenek ne’ebé durante ne’e kontribui ba dezenvolvimentu UNTL no rai ida-ne’e nian. Ohin-ne’e sira-nai tolu, Doutór Aurélio, Sr. Armindo Maia no matebian José António, mak lidera konferénsia nasionál no antes ne’e mós sira na’in tolu mak lidera”, dosente UNTL, Vitor Soares, ba TATOLI.
Nia dehan triste. “Destinu ne’e ita la espera, tanba ohin-dadeer mai-ne’e nia di’ak hela maibé derepente de’it rona mate”.
Matebian José António asume knaar hanesan Diretór Sentru Nasionál Sientífiku iha UNTL no antes ne’e matebian hanesan dekanu iha fakuldade siénsia sosiál no dekanu Interinu ba Fakuldade Filozofia Siénsia Umana.
“Nia ami-nia dosente señór permanente iha ami-nia departementu FASPOL nian. Nia hanesan estudante pioneiru iha ne’e. Tanba bainhira ha’u sei estudante iha UNTL ne’e nia diretór iha FASPOL ona”, dehan.
Nia haktuir la hatene konaba matebian nia moras, tanba ohin-dadeer mai ho kondisaun di’ak no dirije hela konferénsia nasionál ida-ne’e.
Reitór UNTL, João Soares Martins, hatete profesór José António ne’ebé organiza konferénsia nasionál ne’e foin simu informasaun katak nia iis kotuk minutu liubá.
Lori UNTL nia naran, nia hato’o sentidu kondolénsia ba família.
Dekanu Interinu FFCH, José António Lourenço da Costa, hetan desmaia no monu iha auditóriu kampus fakuldade iha dadeer no lori kedas ba HNGV, maibé la-konsege salva nia vida.
José António Lourenço da Costa tama Universitas Timor Timur (UNTIM) iha 1992, hafoin ramata estudu no sai dosente permanente iha departementu siénsia polítika, fakuldade siénsia sosiál iha UNTL.
José António Lourenço da Costa, iha 2025 simu konfiansa no assume responsabilidade nu’udar dekanu interinu fakuldade filozofia siénsia umana.
Matebian moris iha Bukoli, Postu Administrativu Baukau Villa, Munisípiu Baukau.
Doutór José António, MA,SSi iha vida profesionál termina nia lisensiatura iha UNTIM, Mestradu iha Lisboa no Doutoradu iha Évora, Portugál.
Matebian mós hanesan membru movimentu estudante kontra okupasaun, ativista organizasaun oioin no atividade seluk tan. Iha tinan 10 ikus, matebian foku liuba mundu investigasaun, hakerek livru, foka ba prosesu aprendizajen iha aula, no sempre sai inisiadór ba serimónia hanesan konferénsia nasionál ligadu ho polítika sosiál nian.
Notísia relevante: PM husu UNTL prepara estudante hodi kontribui no kontinua mehi dezenvolve Estadu
Jornalista : Osória Marques
Editora : Rita Almeida
