DILI, 28 Marsu 2025 (TATOLI)-Primeiru Ministru (PM), Kay Rala Xanana Gusmão, husu ba Universidade Nasionál Timor Lorosa’e (UNTL) atu prepara estudante sira hodi kontribui ba Estadu no kontinua mehi ho vizaun sira ne’ebé iha.
“Dever ba universidade sira-ne’e mak atu prepara joven sira, aban bainrua hakarak sai lider ka la sai lider ne’e depende ba ida-idak, dever universidade sira, prinsipál UNTL prepara estudante sira-ne’e para oinsá sira sai ba sosiedade karik bele kontribui ba nasaun, kontinua mehi sira no vizaun sira ne’ebé ita iha, nune’e lori Timor-Leste ida ne’ebé prosperu”, Xefe Governu dehan iha ninia aprezentasaun bainhira sai oradór ho tema Reflesaun Nasionál kona-ba tinan 50 aniversáriu proklamasaun independensia iha UNTL, sesta ne’e.
PM husu ba estudante sira atu halo leitura beibeik tanba husi lee barak mak hatene buat barak. Alende ne’e PM husu UNTL atu estabelese regra konaba oinsá hatoman estudante sira halo leitura.
“Estudante, joven sira, halo leitura ita bele aprende buat barak, no bele aprende, tanba ida-ne’e mak ita halo diálogu no ita diskute, hodi kuriji, ita-nia INL rasik importante tebes tanba ne’e favor ida, implementa iha ne’e , regra ida atu dehan katak lee, ba estudante sira estuda, estuda, lee mak barak”, nia dehan.
Nia hatutan, harii universidade barabarak maibé sei menus iha siénsia umana, tanba ne’e husu atu reforsa siénsia umanidade iha universidade sira.
“Ita tenke reforsa siénsia umana ne’e, ita tenke prepara estudante sira ne’ebé hanoin, estuda depois ita iha kapasidade para atu fo esplikasaun, kona-ba saida mak sira aprende iha kampus no sira-nia hanoin”, informa PM.
Notísia relevante: PM Xanana husu dosente sira forma jerasaun foun ho kualidade
Jornalistra : Osória Marques
Editora : Rita Almeida
