DILI, 23 jullu 2024 (TATOLI)–Primeiru-Ministru (PM), Kay Rala Xanana Gusmão, husu ba dosente hotu atu forma jerasaun foun sira ho kualidade hodi dezenvolve rai ida-ne’e tanba Timor-Leste presiza ema matenek hodi ukun no atinje eroi sira-nia mehi.
“Kursu mestradu iha polítika públika ba programa pos-graduasaun no peskiza ne’e importante tebes. Nune’e, husu ba hotu-hotu atu esforsu-an, liu-liu dosente sira atu forma jerasaun foun sira ho kualidade. Tanba ita-nia rai sei presiza nafatin ema ne’ebé matenek hodi dezenvolve nafatin ita-nia rai hodi kaer metin nafatin ita-nia eroi sira-nia mehi katak nasaun ne’e bele ukun-an no povu bele moris di’ak,” PM hateten hafoin halo abertura ba kursu mestradu iha polítika públika ba programa pós-graduasaun no peskiza, iha salaun Universidade Nasionál Timor-Lorosa’e (UNTL), Caicoli, tersa ne’e.
Nia fó hanoin, ba estudante sira atu apreende nafatin no kumpre dever hodi dezenvolve rai ne’e ba oin ho di’ak.
“Jerasaun foun sira tenke lee barak, tenke kria kultura pensamentu krítiku atu nune’e bele haree buat ida-ne’ebé mak di’ak ho krítiku la’ós di’ak de’it maibé tenke haree mós ba nia a’at,” Xefe Governu akresenta.
Notísia relevante : UNTL iha obrigasaun haruka dosente kontinua ba kursu mestradu
Reitór UNTL, João Martins, konsidera, lansamentu kursu ne’e importante tebes ba timoroan sira hotu.
“Espetativu importante husi kursu ida-ne’e mak espera Governu bele tau atensaun liu tan mai kresimentu, konserteza dever UNTL nian atubele forma futuru líder timoroan nian. Oinsá mak ita bele realiza formasaun di’ak ba joven estudante sira atu nune’e aban bainrua bele sai sidadaun di’ak no líder di’ak iha Timor-Leste,” Reitór tenik.
Nia admite, pensamentu krítiku ne’e importante tebes tanba tenke kria ambiente krítiku iha universidade laran atu estudante sira bele haree sasán ho krítiku, la’ós haree de’it buat ne’ebé mak di’ak maibé haree mós ba buat ne’ebé la di’ak, tanba ne’e sira presiza halo análiza kle’an hodi hatene nia abut ho razaun sira ne’e.
Vise-Reitór ba asuntu pos-graduasaun no peskiza, Afonso de Almeida, esplika, bázikamente kursu ne’e atu forma espesialista sira iha área polítika públika atubele asegura instituisaun Governu ne’e bazeia ba implementasaun sira.
“Entaun, polítika públika ne’e importante tebes, durante ita-nia ezisténsia UNTL laiha kursu polítika públika, ita iha de’it mak polítika lisensiatura, entaun ita loke tan mestradu ne’e para depois forma tan espesialista sira iha área polítika públika atubele asegura desizaun sira ne’ebé mak foti ligadu ho polítika kada ministériu nian, ne’e bazeia ba evidénsia,” nia katak.
Dosente sira ne’ebé iha siénsia polítika, iha doutoramentu na’in-15, tanba ne’e sira bele asegura kursu ne’e no serbisu hamutuk tan ho universidade husi Portugal no Indonézia atu kontribui mós sira-nia profesór balun atu nune’e kursu mestradu ida-ne’e bele la’o ho di’ak.
“Antes kursu ne’e la’o, ita hala’o kursu lingua portugés iha fulan-3 ou 4 nia laran, antes sira hahú sira-nia kursu tanba ita hakarak graduadu husi UNTL pelumenus sai ho koñesimentu portugés oituan, tanba ne’e mak iha kursu mestradu ne’e teze hotu-hotu tenke halo ho portugés ou inglés. Daudaun iha estudante 25. Aula hotu-hotu sei la’o laborál, portantu hahú oras 6 to’o 8 ou oras 9,” nia dehan.
Daudaun ne’e kursu mestradu ho kustu $3.000-resin, ne’ebé kada kursu termina tinan-2, tanba ne’e iha estudante barak mak laiha kapasidade atu selu rasik, nune’e estudante sira ne’ebé tuir kursu ne’e maioria funsionáriu.
“Maibé neineik kuandu ita hakarak ne’e joven sira mak barak para prepara joven sira ba futuru nasaun nian, no ba oin ita mós tenta para hetan bolsa estudu husi parte Governu nia, liu-liu FDCH nune’e joven sira-nia partisipasaun ne’e tenke maioria,” nia tenik.
Jornalista : Osória Marques
Editora : Julia Chatarina
