UNTL iha obrigasaun haruka dosente kontinua ba kursu mestradu
DILI, 25 abríl 2024 (TATOLI)—Reitór Universidade Nasionál Timor Lorosa’e (UNTL), João Martins, hateten, kona-ba dosente lisensiatura ne’ebé ensinu iha UNTL ne’e iha obrigasaun kontinua ba kursu mestradu.
Notísia Relevante: Reitór UNTL konsidera kursu mestradu kontribui ba dezenvolvimentu siénsia
“Lisensiatura ne’e sira-ne’ebé seniór bele hanorin, estudante semester ida no rua ne’e, sira seluk ne’e mestradu no doutoramentu mak hanorin. Maibé la’ós atu rezolve, maibé ami nia dosente sira-ne’e mestradu hotu. Ami iha mekanizmu rekruta ema mai ho lisensiatura bele tama iha grau D, maibé bainhira sira tama mai, universidade iha obrigasaun bele haruka sira ba mestradu,” nia hateten ba Agência Tatoli, hafoin konferénsia imprensa kona-ba estudante la ativa iha UNTL, iha salaun UNTL, Caicoli, kuarta ne’e.
Daudaun ne´e, nia hatutan, dosente iha UNTL ne’e maiória mestradu no doutoramentu, númeru lisensiatura ne’e uitoan de’it no iha dosente ne’ebé idade 50 ba leten bele tama reformadu ne´e agora hamutuk kuaze 20.
“Daudaun ne’e dosente permanente iha UNTL 420, maibé hamutuk ho dosente kontratadu ne´e purvolta 600-resin, doutoramentu 70-resin. Dosente idade reforma mós iha lubuk ida, kala kuaze ema na´in-20 maibé seidauk bele reforma, tanba lei reforma obrigatóriu, seidauk iha no sira sei ativu hela,” nia hateten.
Entretantu, Diretór Ezekutivu Ajénsia Nasionál Avaliasaun Akreditasaun Akadémika (ANAAA), Nilton Paiva, hateten atu hanorin estudante iha universidade ida tenke ema ne´e ho grau mestradu.
“Ha’u hanoin Universidade hatene muito bom kona-ba estandar ANAAA nian ba rekursu umanu. Iha ne’ebá hateten klaru, dosente ne’ebé hanorin lisensiatatura tenke ho grau mestradu. Se universidade no instituisaun mak konsinte dosente ho grau S1 hanorin estudante sira, ha’u hanoin ANAAA sei toma nota no fo atensaun ba reitór sira hodi haree,” nia hateten.
Jornalista : Osória Marques
Editór : Cancio Ximenes
