DILI, 09 Abríl 2025 (TATOI) – Prezidente Komisaun Ezekutiva Eletrisidade Timor-Leste, Empreza Públika (EDTL, E.P), Paulo da Silva, informa katak asinatura ba Power Purchase Agreement (PPA) ho empreza konsóriu EDF Renouvelables International husi Fransa no ITOCHU Corporation husi Japaun adia ba fulan oin.
Tuir loloos, asinatura akordu ne’e realiza iha Marsu, maibé empreza rua ne’e muda, tanba sira sei kompleta dokumentu sira relasiona ho kontratu nian ne’ebé deskreve ona iha akordu laran.
“Kuandu buat hotu la’o di’ak ita bele dehan iha fim de Abríl la’e Maiu tinan ne’e asina ona akordu PPA hodi prosesa ba implementasaun projetu Photovoltoltaics (PV) iha Manatutu ne’e”, Paulo da Silva informa ba TATOLI via telefone.
Antes ne’e, dirijente ne’e dehan bainhira asina tiha PPA ho empreza manán-na’in mak sei haruka ba Kámara Konta halo fiskalizasaun ba kontratu no bainhira akordu sira ne’e loos ona no hetan ona vistu mak tama ba implementasaun projetu ne’ebé sei hahú iha Juñu ka Jullu.
Nia esplika katak asinatura PPA ne’e halo tanba investimentu ida-ne’e nu’udar investimentu privadu, katak empreza sira rasik mak tau osan, konstrui, opera no halo manutensaun hotu
Konstrusaun no instalasaun planta solár-PV iha Manatutu ne’e rasik ho nia kapasidade mínimu 72 MW to’o 85 MW, subestasaun no armazenamentu barteria ho kapasidade 36 MWh.
“Bainhira implementasaun ne’e ramata ona mak sira fa’an kustu mai ita ne’e kada unidade enerjia Kilovolt-Ampere (KVA) ho folin sentavu $0,6 per kWh”, Paulo da Silva adianta.
Objetivu husi Governu hakarak investe ba projetu solár PV ne’e, tanba sei ajuda Timor-Leste halo poupansa ba despeza ba sosa gazoél ba jeradór sira iha Hera no Betanu.
PPA ka Akordu ba Akizisaun Enerjia mak Kontratu Fornesimentu Eletrisidade nu’udar kontratu longu prazu ida entre produtór eletrisidade no kliente (Kliente-bele husi servisu públiku, Governu ka empreza ida).
Notísia relevante: https://tatoli.tl/2025/02/12/edtl-no-empreza-konsorsiu-internasional-sira-asina-ppa-iha-marsu/
Jornalista: Arminda Fonseca
Editora: Maria Auxiliadora
