DILI, 09 Abríl 2025 (TATOLI)-Governu liuhusi Ministra Solidariedade Sosiál no Inkluzaun (MSSI), Veronica das Dores, rejeita informasaun konaba ko’a subsídiu ba idozu no invalides iha suku Kolimau, ne’ebé fó-sai husi deputadu opozisaun, José da Cruz, iha plenária segunda foin lalais ne’e.
Deklarasaun hanesan hato’o mos husi Prezidente Institutu Nasionál Seguransa Sosiál (INSS), Arlindo Pinto. “Informasaun sai iha públiku katak ko’a ferik katuas sira-nia osan ne’e laloos”, Prezidente INSS esklarese ba TATOLI.
Nia dehan ekipa INSS ho destakadu solidariedade sosiál munisipál no ekipa inspetór sira agora halo hela investigasaun iha suku referidu.
Ministra Solidariedade Sosiál no Inkluzaun (MSSI), Verónica das Dores, akresenta INSS nunka ko’a ema-nia osan.
“MSSI la iha medida ida, tanba ne’e iha administrasaun Estatal nian okos, ami sempre iha koordenasaun ho administradór sira, ne’ebé maka destaka iha ne’ebá, postu administrativu ida-idak”, katak nia.
Nia dehan tan: “Ha’u haree iha mídia iha ona, informasaun ami simu ona, no ami nian pesoál iha tiha ne’ebá, no halo tiha investigasaun, dehan la tuir saida maka fó sai iha mídia sosiál”.
Xefe Suku Kolimau, Postu Administrativu Bobonaru, munisípiu Bobonaru, Teotonio Marques rejeita informasaun ne’ebé espalla iha mídia sosiál katak, ko’a osan idozu nian ho montante 30 dolar.
“Hanesan autoridase lokál suku lamenta, deputadu nia dever hanesan fiskalizadór bainhira rona informasaun hanesan ne’e, presiza tun ba terrenu halo fiskalizasaun hodi husu informasaun ne’ebé loloos mak bele hato’o iha plenaria”, nia dehan.
Autoridade lokál ne’e esplika komunidade sira halo kontribuisaun osan ne’e iha, maibé liuhusi enkontru no komunidade iha suku Kolimau hotu-hotu aseita maka sira halo kontribuisaun ba atividade Kruz Joven ne’ebé vizita suku Kolimau, hahú husi loron 10-28 fulan-Fevereiru tinan 2025, atividade refere preparasaun antes tuir data ne’ebé termina husi oráriu parókia nian.
“Kontribuisaun ne’ebé mai husi komunidade ne’e atu aloka ba preparasaun harii uma-laku, konsumu durante loron 18, kontribuisaun ne’e ami halo liuhusi enkontru ekipa forma komisaun no seksaun sira no liuhusi enkontru maka desidi halo kontribuisaun husi uma-kain, funsionariu, autoridade, emprezáriu, inan-aman, idozu sira, maibé la signifika ne’e kobransa, maibé kontribuisaun nu’udar sarani hatudu fiar liuhusi vízita Kruz Joven nian”, dehan nia.
Nia esplika: “Ami iha formatu osan nian ne’e kada uma-kain $5, suku Kolimau oan hela iha Maliana no Dili $10, emprezáriu lokál $100, kargu xefia $50, veteran $10, funsionáriu baibain $20, idozu sira $30”.
Nia dehan, suku Kolimau iha aldeia lima mak hanesan, Atublogo, Beamoas, Lo’o Dasi, Manunia, Tegoabe, xefe família 400 resin, no totál populasaun 2.225.
Notísia relevante: Benefisiáriu sira klarifika Xefe suku Kolimau la ko’a subsídiu idozu-Invalidés
Jornalista : Osória Marques
Editora : Rita Almeida
