DILI, 09 Abríl 2025 (TATOLI) – Prezidente Interinu Autoridade Munisípiu Dili, António Agosto Guterres apela ba komunidade sira ne’ebé hala’o atividade negósiu iha Dili atu labele harii tenda iha espasu públiku sira.
“Vendedór ambulante sira bainhira hala’o negósiu tenke temporária. Labele harii tenda permanente iha espasu públiku hodi hamosu engarrafamentu ba movimentasaun,” Prezidente Interinu ne’e hateten ba jornalista iha edifísiu TATOLI, I.P, Farol Dili.
Vendedór sira ne’ebé mak identifikadu harii tenda permenante, tuir prezidente interinu autoridade Munisípiu Dili ne’e mak alende iha fatin seluk iha Merkadu Kampung Baru no Merkadu Komoro.
“Bainhira ita notifika, tanba saida maka sai ona mai fila-fali? Kuandu haree ho matan mak haruka ekipa ne’e ba hakbesik aan, identifika, apelu ba sira; ita-boot sira (vendedór) ba ona fatin seluk, labele mai fa’an ona, nusa mak mai fila-fali?”, nia kestiona.
Autoridade munisípiu Dili ne’e hateten, só halo identifikasaun ba vendedór ambulante sira katak se bainhira dudu de’it roda tolu, provizoriamente, akompaña de’it maibé bainhira sira harii fila fali tenda mak sei fó avizu.
“Kuandu mai fila-fali maka sei dada nafatin de’it, entaun ha’u hakarak rona no konfirma ba dirijente ba autoridade munisípiu liuliu ba jestaun merkadu no saneamentu inklui Obras Públikas. Tolu ne’e maka segmentu importante ne’ebé iha ligasaun servisu, interligasaun ba malu,” nia dehan.
Prezidente Interinu Autoridade Munisípiu Dili, António Agosto Guterres akresenta, maske nia parte seidauk iha informasaun ruma ba nia kona-ba fatin sira-ne’ebé ema halo mamuk ona, okupa fila-fali, nune’e sei ko’alia ho jestaun merkadu inklui saneamentu.
Bainhira konfirma kona-ba implementasaun polítika ba iha vendedór sira mak laduun adekuadu ka oinsá, nia dehan, “Ha’u lahateten dehan polítika ladi’ak. Politika la di’ak ne’e maka balun kumpre mas polítika ladi’ak ne’e katak ita lakohi rona, lakohi koopera, lakohi kontribui para hadia ita-nia sidade ne’e sai sidade hanesan rai seluk nian”.
“Bainhira sidade ida-ne’ebé moos ne’e ita kontribui. Kontribui nu’udar sidadaun; matan, tilun ibun ne’e koalia ba malu, mas la rona prontu ne’e signifika fó tempu ba aban bainrua para di’ak”, nia énfaze.
Notísia relevante:AMD sei implementa koima ba komunidade ne’ebé soe lixu arbiru
Jornalista: Alexandra da Costa
Editór: Rafael Ximenes de A. Belo
