DILI, 09 Abríl 2025 (TATOLI)-Ministra Solidariedade Sosiál no Inkluzaun (MSSI), Verónica das Dores, klafika prosesu ne’ebé família atu asesu subsídiu mate-nian liuhusi seguransa sosiál iha Institutu Nasionál Seguransa Sosiál (INSS), liu-liu funsionáriu ka ajente ne’ebé lakon vida (mate), presiza trata dokumentu erdeiru.
“Ita presiza trata dokumentu erdeiru, para ita labele selu sala”, dehan nia iha Bebora.
Ministra ne’e katak, sira halo alterasaun ba trata dokumentu erdeiru ne’e, tanba daudaun ne’e pesoál MSSI nian maka servisu iha INSS nian, ne’ebé destaka ona iha munisípiu sira, atu haree asuntu sira-ne’e.
“Servisu ne’e la’ós INSS mesak, ne’e tenke servisu ho administradór postu administrativu, xefe suku no xefe aldeia, tanba INSS la hatene sé maka mate ona. Entaun ami tenke simu informasaun husi autoridade lokál sira, depois ami komfirma ho nia dokumentu maka sira bele asesu ba matebian ka ajente ida ne’e nia osan seguransa sosiál iha INSS”, katak nia.
Governante ne’e esklarese prosesu agora atu trata dokumentu erdeiru ne’e la hanesan ona uluk, tanba uluk ne’e presiza dokumentu barak, agora ne’e iha dokumentu kartaun eleitorál, mate iha ne’ebé, konfirma autoridade lokál, nia bele trata ona dokumentu, no família bele simu ona pensaun husi matebian nia.
Benefisiáriu husi subsídiu iha seguransa sosiál mak parentalidade, inválidu, vellise, no mate-nian (Benefisíu no protesaun Seguransa Sosiál iha Timor-Leste (segurancasocial.gov.tl).
Notísia relevante: INSS lansa mobile APP
Jornalista : Osória Marques
Editora : Rita Almeida
