DILI, 09 Abríl 2025 (TATOLI)—Komisaun E iha Parlamentu Nasionál (PN) ne’ebé trata asuntu Infraestrutura deteta implementasaun projetu balun iha terrenu la tau informasaun kona-ba obra iha kuadru avizu.
“Ami komisaun mós deteta, lalika bá munisípiu, ita iha Dili de’it obra ida halo morru iha Tasi-tolu kuadru informasaun ne’e iha, mais montante mak sira la tau, maibé kompañia ne’e konfesa ba Komisaun katak sira haluha de’it mak la tau, mais ami nafatin rekomenda tenke tau nomós nia orsamentu ne’e hira no durante tempu hira tau iha ne’ebá,” Prezidente Komisaun F, Marcos Xavier, fó sai iha resintu PN, kuarta ne’e.
Nia dehan, iha orsamentu alokadu ba kuadru informasaun, tanba ne’e empreza responsável obra tenke tau informasaun.
Notísia relevante : Konstrusaun Aeroportu Suai apoia operasaun projetu SSB
Iha Sorin seluk, Deputadu Bankada Opozisaun husi Partidu Libertasaun Populár (PLP), Abel dos Santos, observa, maioria implementasaun projetu ho persentajen 75% ne’ebé daudaun la’o hela laiha kuadru avizu.
“Tuir loloos tau netik ba para atu hateten projetu ne’e implementa ho orsamentu hira, depois nia durasaun ne’e fulan no tinan hira, mais iha ne’ebá laiha, ida-ne’e mós afeta ba Deputadu sira-nia fiskalizasaun,” nia preokupa.
Vise-Ministru ba asuntu Parlamentár, Adérito Hugo da Costa, hateten, Deputadu sira antes ne’e levanta ona kestaun ne’e, tanba ne’e ministériu relevante mak tenke halo esplikasaun detalla kona-ba asuntu ne’e, karik iha razaun balun.
“Pur ezemplu obra ne’e emerjénsia bele akontese volume ne’e bele aumenta kuandu obra ne’e emerjénsia atu halo de’it metru 10, mais ida-ne’e bele iha posibilidade ba ema bolu bele aumentu, kaundu projetu ne’e la’o ba hadi’a metru 10 mais depois akontese deteta tan metru hira aumenta, entaun ne’e mak labele halo kálkulu ba kustu ida fiksu,” nia argumenta.
Governante ne’e dehan, maski nune’e padraun obra públika nian aprovizionamentu hatene hela obra metru 10 ne’e ninia volume no kustu hira, karik nia aumenta hira nia kustu sei aumenta tuir formula ne’ebé sira halo kálkulu sei la aumenta no sira mós submete ba fiskalizasaun.
“Tanba razaun sira ne’e mak dalaruma la tau fisku kálkulu ne’e, tanba tau tiha fisku mais to’o implementa hotu projetu ida metru tolu, ikus mai bele aumenta tan,” Vise-Ministru katak.
Jornalista : Nelson de Sousa
Editora : Julia Chatarina
