DILI, 09 Abríl 2025 (TATOLI) – Governu revoga dekretu-lei númeru 72/2022, loron 19 fulan Outubru, kona-ba Rejime Jurídiku ba Parseria Públiku-Privada Servisu Diagnóstiku nian.
Ministra Finansa, Santina Cardoso, esplika katak ezekusaun husi projetu ne’ebé relasiona ho Parseria Públiku-Privada hasoru atrazu no difikuldade institusionál sira, nune’e Governu deside atu avalia no hasai filafali projetu ne’e husi inisiativa prioritária sira.
Tuir nia, desizaun ne’e formaliza ona husi Konsellu Administrasaun Fundu Infraestrutura nian (KAFI. Ne’ebé konsidera katak projetu ne’e kansela tiha ona definitivamente, revogasaun Dekretu-Lei n. 72/2022 ne’e presiza atu hasai dúvida interpretativa, garante seguransa jurídika no halakon regra sira ne’ebé la aplikavel ona.
“Ita revoga dekretu-lei númeru 72/2022, ne’ebé ita hatene katak kona-ba Parseria Públiku-Privada ne’e, normalmente ba kada projetu ita iha dekretu-lei ne’ebé regula. Entaun ohin ne’e ba diagnóstiku saúde nian, iha tinan anteriór Minsitra Saúde aprezenta ona ba KAFI katak di’ak liu ita halo aprosimasaun bilateral, entaun hodi filafali dekretu-lei ne’e hodi revoga de’it”, Santina Cardoso, hateten iha Palásiu Governu, ohin.
Lembra katak, iha 27 Jullu 2022, Governu aprova projetu-lei estabelese Rejime Juridiku Parseria Públiku Privada (PPP) Servisu Diagnóstiku nian.
Dekretu-lei ne’e hakarak atu estabelese kuadru jurídiku ne’ebé espesial hodi aplika ba akordu PPP nian relativu ho servisu diagnóstiku laboratoriál no liuhusi imajen, ne’ebé define rejime ida ne’ebé fleksivel liu no adekuadu ba kolaborasaun parseiru privadu ida iha prestasaun servisu públiku nian, hodi haree mekanizmu sira ne’ebé asegura sustentabilidade, alokasaun risku, operasionalidade no kualidade servisu ne’ebé fó ba populasaun.
Nune’e, bele estabelese kuadru juridiku ne’ebé klaru, justu, previzivel no estavel ne’ebé permite atu estimula no atrai investimentu privadu no hodi garante prestasaun servisu públiku diagnóstiku laboratoriál no liuhusi imajen.
Notísia relevante: https://tatoli.tl/2022/07/27/governu-estabelese-rejime-juridiku-parseria-publiku-privada-ba-servisu-diagnostiku/
Jornalista: Arminda Fonseca
Editora: Maria Auxiliadora
