VIKEKE, 09 Abríl 2025 (TATOLI)—Sekretaria Estadu Igualidade (SEI) no grupu feto selesionadu hamutuk 10, kuarta ne’e, asina akordu asesu ba Fundu Hadulas iha munisípiu Vikeke.
Reprezentante Diretór Nasionál Dezenvolvimentu Igualdade Jéneru husi SEI, Abril S. de Araújo, relata, SEI loke Fundu Hadulas iha tinan 2024 ba munisípiu sira, ne’ebé husi munisípiu Vikeke iha grupu hamutuk 30 mak konkorre, maibé iha prosesu ekipa halo selesaun no avalia proposta sira, nune’e iha grupu 10 mak pasa.
“Grupu sira-nia osan iha tinan kotuk transfere kedas ba konta bankária Asosiaun Feto Potensiál Vikeke. Maibé, ita labele realiza asina akordu ho grupu 10 ne’ebé pasa iha selesaun. Tanba ne’e, iha tinan 2025 ita foin asina akordu ho grupu sira ba orsamentu Fundu Hadulas,” Diretór Nasionál hateten iha salaun Administrasaun Vikeke.
Nia dehan, grupu sira sei hala’o atividade durante tinan-rua ho osan husi Fundu Hadulas no entrega fila ba Asosiasaun Feto Potensiál Vikeke hodi apoia fali ba grupu sira seluk ne’ebé presiza fundu ne’e.
“Fundu ida-ne’e iha mata-dalan, ita-nia Autoridade lokál, liuliu Xefe suku sira mak sai sasin ba atribuisaun fundu ne’e. Nune’e, orsamentu ne’ebé SEI aloka mai munisípiu Vikeke hamutuk $11.000, aloka ba Asosiasaun Feto Potensiál Vikeke $1.000 hodi halo monitorizasaun ba grupu sira no aloka ba kada grupu $1.000,” nia hameno.
Notísia relevante : SEI tinan ne’e atribui ajudu ba Asosiasaun Feto sira iha munisípiu
Iha fatin hanesan, Prezidente Asosiasaun Feto Potensiál Vikeke, Luciana Guterres, husu grupu benefisiáriu sira atu jere orsamentu sira-ne’e hodi aumenta atividade ne’e bele hakbi’it no haforsa família nia ekonomia uma-laran.
“Tanba ne’e, ha’u husu ba grupu benefisiáriu sira atu jere didi’ak Fundu Habulas. Nune’e mós ha’u agradese ba SEI ne’ebé kada tinan sempre prevee Fundu Hadulas mai Vikeke hodi tulun ba grupu sira-nia atividade ekonomia,” nia akresenta.
Iha biban ne’e, Sekretáriu munisípiu Vikeke Asuntu Sosiál no Organizasaun Komunitária, Acâcio de Sousa, hateten, grupu sira tenke responsabiliza orsamentu Hadulas hodi bele benefisia grupu, tanba dala barak akontese bainhira osan sai grupu fahe malu.
“Ha’u husu grupu sira organiza malu ho di’ak. Atu nune’e membru sira labele fahe malu, ita-nia Governu apoia fundu ba ita hodi motiva ita halo dezenvolvimentu iha ita-nia ekonomia família nian,” nia katak.
Sekretáriu munisipál sujere, grupu benefisiáriu sira bele uza osan ho transparánsia perante membru sira hodi labele mosu dúvida iha grupu laran.
Atividade ne’e partisipa husi Autoridade lokál, Diretór IADE Vikeke no grupu benifísiariu sira iha munisípiu Vikeke.
Jornaista : Vitorino Lopes da Costa
Editora : Julia Chatarina
