BOBONARU,09 Abríl 2025 (TATOLI)- Prezidente Tribunál Rekursu,Deolindo dos Santos, kuarta ne’e, ho komunitiva halo enkontru ho Prezidente Autoridade Munisípiu Bobonaro, Alexandre Pires, hodi ko’alia kona-ba prosesu establesimentu no dezeñu konstrusaun edefísiu Tribunál Judisiál Primeira Instánsia Bobonaru.
Biban ne’e, Prezidente Tribunál Rekursu ho ekipa bá observa direita rai ne’ebé Terra no Propriedade Munisípiu Bobonaru entrega atu harii edifísiu Tribunál Judisiál Primeira Instánsia Munisípiu Bobonaru.
Notísia Relevante:Komisaun A husu Governu prioriza estabelese Tribunál Primeira Instánsia iha munisípiu
“Ami mai atu koalia kona-ba prosesu nee’ebé agora la’o daudaun atu harii Tribunál Judisiál Primeira Instánsia Munisípiu Bobonaru nian, ne’ebé lori tinan barak ami halo nia prosesu dezde 2018 hodi hetan rai no atribui tiha ona ba Tribunál Rekursu, nune’e dezeñu prontu ona no submete ona ba Kominasaun Nasionál Aprovizionamentu hodi halo konkursu. Portantu iha fulan-neen nia laran sei termina konkursu sei hatene se mak manan-nain”, Diretór Jerál iha Tribunál Rekursu,Eugénio Soares, relata ba Jornalista sira iha Munisípiu Bobonaru.
Estatutu rai atu harii tribunál refreridu ne’e loos ona tanba Tribunál Rekursu simu ona sertifikadu atribuisaun rai husi Diresaun Terra no Propriedade Munisípiu Bobonaru no halo ona kompensaun ba komunidade afetadu.
Nune’e, Diretór ne’e hatutan konstrusaun edifísiu ne’e kompleta ho rezidénsia ba Juíz sira nia ho totál uma unidade hitu ne’ebé sei konstrui iha rai ektare rua iha área Soso besik Estádiu Malibaka Yamato Maliana.
“Ninia orsamentu ami labele ko’alia sai tanba agora la’o hela konkursu, hafoun empreza manan taka sai mak kompleta ho nia orsamentu”, nia afirma.
Iha fatin hanesan, PAM Bobonaru, Alexandre Pires, lori povu munisípiu Bobonaru nia naran agradese ba Prezidente Tribunál Rekursu tanba bele konsidera no tau prioridade atu harii tribunál iha munisípiu Bobonaru hodi fasilita komunidade asesu besik liután ba justisa.
“Ita nia komunidade sira tenke-ser la’o ho distansia ne’ebé do’ok teb-tebes dalaruma toba iha dalan foin bele to’o Kovalima”, nia preokupa.
Ho situasaun ne’e, nia dehan Autoridade Munisípiu Bobonaru prontu koordena no kolabora ho Tribunál Rekursu, nune’e prosesu hotu bele la’o ho di’ak no susesu.
Alende Munisípiu Bobonaru Tribunál Judisiál Primeira Instánsia ne’e sei harii iha munisípiu sira hanesan Munisípiu Baukau,Ermera no Viqueque.
Notisia Relevante:Projeto Mai Munisípiu Konklui ona Kolaborasaun ho TR
Jornalista: Sergio da Cruz
Editór: Florencio Miranda Ximenes
