DILI, 09 Abríl 2025 (TATOLI)-Prezidente Repúblika, José Ramos Horta, enkoraja foin-sa’e sira atu estuda área téknika sira, direitu, ekonomia no intelijénsia artifisiál.
“Estuda siénsia no teknolojia, medisina, ekonómia, administrasaun negósiu, liuliu dijitalizasaun, intelijénsia artifisiál, ida-ne’e nesesáriu. Sira ne’ebé la jere intelijénsia artifisiál sei labele governa, la’ós atu troka ema ho mákina, maibé oinsá atu hatene teknolojia ida-ne’e hodi serve di’ak liután umanidade”, Xefe Estadu hatete bainhira sai oradór iha konferénsia nasionál ho tema “Reflesaun kona-ba tinan 50 aniversáriu proklamasaun independensia Timor-Leste” iha auditóriu UNTL, Kaikoli, ohin.
Prezidente Repúblika dehan bainhira ema-ida hakarak aprende área medisina, liliu hakarak koñese konaba moras-ida, artifisiál intelejénsia bele fornese informasaun kompletu tuir ita-nia pedidu.
Xefe Estadu halo komporasaun vida ekonómika no sosiál iha 2002 mak ema-nia eskolla ba universidade limite no esperansa ba moris menus, enkuantu ohin-loron ema iha opsaun lubun atu eskolla ensinu superior, nune’e mós esperansa ba vida-nian aumenta.
Nia haktuir ezemplu konkretu mak iha 2002, iha de’it médiku timoroan na’in 19 ka 20, ohin loron médiku timoroan rihun-ida resin.
Victor Soares nu’udar estudante konsidera atividade ne’e hanesan referénsia ne’ebé di’ak tebes, bainhira nesesita hakerek livru.
Tuir partisipante ne’e, importante tebes atu aprende istória rasik. Tanba ne’e, nia rekomenda ba governu atu toma atensaun ba estrada, edukasaun, saúde, seguransa ai-han, no seluk tan.
Notísia relevante: UNTL realiza semináriu ASEAN 2025
Jornalista : Osória Marques
Editora : Rita Almeida
