DILI, 10 Abríl 2025 (TATOLI)—Centro Nacional Chega, Institutu Públiku (CNC, I.P) sei oferese tan uma memória esperansa ba sobrevivente na’in-neen iha tinan ne’e nia laran.
Diretór Divizaun Solidaridade Sobrevivente iha CNC, Nelson Miranda Seixas, hateten, daudaun CNC identifika ona sobrevivente hamutuk 14, maibé ekipa sei tun ba terrenu hodi observa no re-verifika hodi haree ninia nível vulnerabilidade hafoin lori lista ba jestór instituisaun hodi deside.
“Hahú tinan nee ita konstrui tan uma neen ho totál orsamentu $111.000, kada uma hetan la liu $14.000,” nia hateten ba Agência Tatoli, iha edifísiu CNC, Balide.
Notísia relevante : CNC, I.P finaliza ona uma memória esperansa unidade haat
CNC implementa programa uma memória ba esperansa hahú husi 2021 to’o 2024, ne’ebé halo ona uma hamutuk 20 hodi oferese ba vítima funu nian.
“Uma 20 ne’e iha kada munisípiu kuaze atu hotu ona, falta Manatutu no Ermera mak seidauk,” nia akresenta.
Diretor ne’e esplika, uma sira ne’ebé fó ne’e ba sobrevivente sira ne’ebé mak vulnerável liu no presiza duni hetan fatin dignu.
“Uma sira ne’ebé apoiu ne’e ninia gastu la liu $15.000, tanba uma nia medida 7×9, kuartu tolu, hariis fatin iha laran, sala vizita no dapur iha li’ur,” nia tenik.
CNC rejista sobrevivente konflitu pasadu ne’ebé hetan uma ne’e mak hanesan idoza na’in-neen no restu ne’e mane.
Programa uma memória esperansa ne’e la’o tanba CNC, I.P serbisu hamutuk ho Asosiasaun Vítima hodi apoiu uma liuhusi programa reparasaun vítima no sobrevivente ba konflitu polítiku ne’ebé akontese iha pasadu.
Jornalista : Nelson de Sousa
Editora : Julia Chatarina
