BOBONARU, 10 Abríl 2025 (TATOLI)—Eletrisidade Timor-Leste, Empreza Públika (EDTL, E.P) munisípiu Bobonaru, deside kansela atu hakotu liña eletrisidade ba suku Saburai, postu administrativu Maliana no aldeia Atus, suku Gildapíl, postu administrativu Bobonaru, tanba komunidade kontribui selu ona taxa $36 kada-uma-kain hodi rejistu sai hanesan kliente legál.
Koordenadór EDTL, E.P Munisípiu Bobonaru, Mario de Jesús, hateten tuir loloos kinta (10/04) ohin, prazu ne’ebé EDT, E.P deside hakotu liña eletrisidade maibé la konsege, tanba komunidade suku Saburai no Aldeia Atus barak mak kumpre sira-nia promesa atu sai kliente legál ne’ebé sira promete iha enkontru fulan hirak liubá.
“Lolos ne’e ohin loron ha’u atu bele hakotu liña enerjía ba suku Saburai no aldeia Atus, maibé labele tanba agora dadauk ne’e ita-nia povu hotu-hotu nadodon mai ami-nia edifísiu no sira selu ona. Ne’ebé, ami labele hakotu liña eletrisidade tanba loro-loron ne’e na’in-10 no 20 mai beibeik hodi kontribui selu no sosa pulsa eletrisidade nian,” Koordenadór EDTL, E.P Munisípiu Bobonaru, Mario de Jesús, hateten ba jornalista sira iha nia kna’ar fatin, kinta ne’e.
Nia hatutan, iha tempu badak, tékniku EDTL, E.P munisípiu Bobonaru sei tun ba terrenu hodi instala kontadór prepagu ba uma-kain ida-idak.
Tuir dadus, komunidade suku Saburai no aldeia Atus ne’ebé presiza rejistu sai kliente loloos hamutuk uma kain 400-resin.
Notísia Relevante: EDTL Bobonaru dezliga ligasaun ilegál ualu iha Tapo-Memo
Jornalista : Sergio da Cruz
Editór : Cancio Ximenes
