DILI, 10 Abríl 2025 (TATOLI) – Ministériu Transporte no Komunikasaun (MTK) no Administrasaun Estatál (MAE) daudaun halo hela koordenasaun hodi rezolve kustu ba parajen públiku ne’ebé konstrui iha área Timor Plaza, ne’ebé sobu husi ekipa Sekretaria Estadu Asuntu Toponímia no Organizasaun Urbana (SEATOU).
Ministru Transporte no Komunikasaun, Miguel Manetelu, hateten relasiona ho sobu halte bus ne’e, nia parte haruka ona karta eskrita ba MAE atu rezolve, tanba ida-ne’e harii la’ós de repente, maibé halo observasaun no liuhusi estudu mak orienta ba Diresaun Nasionál Transporte Terrestre (DNTT) hodi konstrui iha fatin konsentrasaun pasajeiru nian.
“Ita haree katak iha Timor Plaza nia oin ne’e pasajeiru barak iha ne’ebá, ne’ebé ita harii halte iha ne’ebá. Maibé, agora SEATOU ho razaun seluk ida bá sobu sasán sira ne’e. Agora, ami ho Estatál, inklui SEATOU ko’alia hela atu rezolve”, Miguel Manetelu hateten iha Palásiu Governu.
Governante ne’e la konkorda ho asaun ne’ebé ekipa SEATOU foti hodi sobu parajen ne’e, tanba presiza kolabora mak sobu no tenke fó razaun fundamentál, nune’e bele muda. “Razaun ne’ebé sira foti dehan halo halte ne’e [tanba] ema bá fa’an fali manu iha ne’ebá”, salienta.
Tuir nia, bainhira ema bá fa’an fali manu iha halte nian ne’e, tanba kontrolu maka la di’ak. “Sé maka kontrolu Dili, autoridade Dili, masa Governu halo tiha halte ema atu fa’an fali manu. Sé udan boot ruma mak ema hamriik iha ne’ebá, tanba udan. Halte ne’e nia funsaun pasajeiru atu hamriik iha ne’ebá hein [karreta]”.
Ba kestaun ne’e, ami iha kordenasaun no buka rezolve asuntu ne’e no importante maka la bele afeta ba kustu, tanba Ministeriu Transporte Komunikasaun labele aumenta verba. “Sobu ne’e impaktu ba kompania, entaun sé mak atu selu ida-ne’e ami iha hela koordenasaun”, nia afirma.
Iha sorin seluk Jestór empreza Carisma Unipessoal Lda, Felizito Chang, hateten sira-nia parte la hatene razaun saida mak ekipa SEATOU sobu halte ne’ebé konstrui ona.
Nia relata katak durante traballadór sira serbisu, ekipa SEATOU bá fó avizu dalarua no dehan labele konstrui halte.
Tanba ne’e, sira bá informa DNTT no rezolve maka kontinua fali serbisu, maibé avizu ba datoluk nian iha fulan kotuk sira la fó razaun ruma ne’ebé forte no haruka traballadór sira sobu de’it.
“Razaun balun ne’ebé traballadór sira rona katak ta’uk ema fa’an fali manu iha ne’ebá, maibé atu kontrola ema fa’an, Governu iha instituisaun ne’ebé atu kontrola. Agora, ita konstrui, ba sobu, ida-ne’e impaktu ba ami”, nia lamenta.
Nia haktuir katak progresu konstrusaun fízika ba parajen ne’e atinje ona 80%-resin mak sobu fali.
Iha 2024, MTK kontrata empreza Carisma ho montante orsamentu $96.956 hodi konstrui parajen 10 iha kapitál, no tuir kontratu sei ramata iha fulan ne’e.
Relasiona ho asuntu ne’e jornalista tenta entrevista ho Sektretáriu Estadu Asuntu Toponímia no Organizasaun Urbana, Germano Santa Brites Dias, maibé nia parte lakohi fó komentáriu.
Notísia relevante: https://tatoli.tl/2025/01/21/konstrusaun-ba-parajen-transporte-publiku-finaliza-iha-abril/
Jornalista: Arminda Fonseca
Editora: Maria Auxiliadora
