OEKUSI, 10 Abríl 2025 (TATOLI) – Governu Timor-Leste liuhu Prezidente Autoridade Rejiaun Adminsitrativa Espesiál Oekusi Ambeno (RAEOA), Rogério Tiago Lobato hamutuk ho Vise-Governadór Nusa Tenggara Timur (NTT), Johni Asadoma, kinta ne’e, ofisiálmente reativa hikas atendimentu iha fronteira postu Integradu Oésilo ho Pos Linta Batas Negara (PLBN, sigla Indonésia) Napan hodi fasilita movimentu komunidade tama sai no fasilita mós atividade importasaun no esportasaun.
Seremónia reativasaun ne’e hahú ho misa agradesimentu tanba postu integradu Oésilo ho PLBN Napan, Governu nasaun rua deside taka kuaze tinan neen ona hahú iha 2019 tanba impaktu husi pandemia COVID-19.
Notísia relevante:RAEOA lansa postu integradu Oésilo hodi hasa’e kresimentu ekonomia fronteira
Tanba ne’e, Prezidente Autoridade RAEOA, Rogério Tiago Lobato, konsidera reativa transfronteira ne’e atu haforsa atividade ekonomia no sei kontribui redus transasaun ilegál.
“Ita loke postu fronteira Oésilo ne’e sei kontribui mós atu hamenus ultrapasa ilegál ka jalan tikus, hala’o negósiu ilegál, hala’o kontra-bandu sira sei menus, entaun ita loke atu ema hotu bele liuhusi ne’e sira-bele selu taxa ba Estadu, hodi la’o ho avontade, ne’ebé ha’u kontente tanba ema sira husi Oésilo atu ba Kefamenanu la presiza la’o do’ok ona ba to’o fronteira Sakato Wini, maibé sira-bele liuhusi ne’e,” Rogério Lobato, informa iha Oésilo.
Rogério Lobato, mós promete ba futuru sei koordena ho autoridade sira husi Indonézia, atu reativa mós postu integradu Pássabe no postu integradu fronteira Nítibe, hodi fó livre ba komunidade atu hala’o atividade ho séguru.
“Planu tuir mai, ita sei koordena sira, atu loke tan postu integradu fronteira Pássabe, hodi fasilita ema sira husi Pássabe atu ba Indonézia la presiza mai fali liuhusi Oésilo, ne’ebé ita sei destaka alfandega, imigrasaun kria mós kondisaun ba sira, atu hala’o servisu, neineik mós ita sei loke tán postu Naktuka, atu asesu ba Kupaun bele lalais,” nia informa.
Notísia relevante:RAEOA aloka rihun $510-resin harii postu integradu Oésilo
Iha fatin hanesan, Vise-Governadór NTT, Johni Asadoma, orgullu tanba liuhusi reativasaun transfronteira postu integradu Oésilo ho PLBN Napan sai esperansa komunidadade nasaun rua nian, atu fasilita importasaun no esportasaun atu hadi’a povu nia moris.
“Ha’u agradese tebes ba Governu distritu TTU no Governu Timor-Leste, atu ita bele halo kedas operasaun PLBN Napan ba bem-estar povu iha área fronteira. Reativasaun, atividade transfronteirisu Timor-Leste no Repúblika Indonézia nian la’ós de’it abertura ba kruzamentu, maibé mós símbolu progresu no esperansa ba nasaun rua, ho reativasaun ida-ne’e, hein katak sei kria no fasilita mobilidade komunidade no distribuisaun sasán no servisu sira materiál no nesesidade povu rai rua nian, atu hadi’a di’ak liután kualidade moris komunidade,” nia dehan.
Governu Indonézia liuliu Nusa Tenggara Timur (NTT) agradese ba Governu Timor-Leste no Indonézia, espera katak bele hetan apoia másimu husi entidade hotu, nune’e atividade iha fronteira fó benefisíu ba nasaun rua.
Tuir observasaun Jornalista TATOLI,I.P, nota, hafoin reativa postu integradu Oésilo ho PLBN Napan, movimentu komunidade kontinua la’o kedas inklui sasán importasaun nesesidade báziku tama daudaun.
Notísia relevante:Alfándega nota empreza importadór hatama sasán hosi postu integradu fronteira terrestre
Jornalista: Abílio Elo Nini
Editór: Florencio Miranda Ximenes
