VIKEKE, 11 Abríl 2025 (TATOLI)—Autoridade Inspesaun Fiskalizasaun ba Atividade Ekonómika Sanitária no Alimentár, Institutu Públiku (AIFAESA, I.P), sesta ne’e, destroi foos marka Tum-Tum hamutuk saku 99 ne’ebé distribui ba programa merenda eskolár ho kondisaun foos fuhuk no metan.
Notísia Relevante: PAM Vikeke identifika foos marka Tum-Tum fornese ba merenda eskolár fuhuk-metan
Diretora Planeamentu Operasionál Risku Alimentár no Laboratóriu (DPORAL) husi AIFAESA, I.P, Josefina Clarinha João, hakutir AIFAESA, I.P dezloka mai munisípiu Vikeke bazeia ba keixa ne’ebé husi autoridade sira relasiona ho foos Tum-Tum ne’ebé fornese ba programa merenda eskolár.
“Ami obeserva foos saku hamutuk 76 ne’ebé asegura iha eskuadra Polísia Nasionál Timor Leste (PNTL) Vikeke Vila no saku 23 rai iha aramazen, ami haree foos ne’e hotu fuhuk iha ona foos ida-ne’e sai evidénsia ida ba ami katak foos sira-ne’e estragu. Tan ne’e, ami halo destroisaun ba foos Tum-Tum saku hamutuk 99 ne’ebé ami halo aprensaun,” Josefina Clarinha João, ba TATOLI, iha sentru lixu, Sukaer-oan, postu Vikeke Vila, ohin.
Diretora AIFAESA, I.P ne’e hatutan, foos marka Tum-Tum mesak fuhuk no foos balun kór kinur, ida-ne’e hatudu katak foos referida aat no aleinde ne’e foos AIFAESA mós aprensaun ba sasán prazu liu iha loja rua iha Vikeke.
“Ba oin ami servisu hamutuk ho autoridade sira liuhusi diresaun seguransa alimentár hodi nafatin fahe informasaun ba komunidade no vendedór sira atu haree konsumu ai-han ne’ebé saúdavel. Liuliu ba sasán sira-ne’ebé liu prazu sira hodi halo distruisaun ba sasán sira-ne’e,” nia hateten.
Iha fatin hanesan, superintendente servisu edukasaun munisípiu Vikeke, Adeodato da Cruz, hateten implementasaun programa merenda eskolár iha postu haat la’o di’ak, maibé iha postu Vikeke Vila inspesaun sira identifika foos aat.
“Tanba ne’e, parte AIFAESA mai hodi halo destroisaun ba foos ne’ebé distribui ba programa merenda eskola Ensinu Báziku Sentral (EBC, sigla portugés) Kabira-Oan. Mak EJP sira halo irregularidade tanba nunka konsulta ba diresaun seguransa alimentár munisipál ne’ebé ne’e koordenadór EBF Uma-Ki’ik mak detekta foos Tum-Tum. Ita haree foos ne’e ladi’ak tanba foos kinur no metan, foos kuandu di’ak ne’e mutin,” nia dehan.
Fó hanoin fali katak foos referida, Prezidente Autoridade munisípiu Vikeke, Francisco C.S de Gonzaga Soares identifika iha loron 02 fulan-Marsu 2025 ne’ebé ekipa inspesaun ba implementasaun programa merenda eskolár tun direta iha Ensinu Báziku Filiál (EBF) 03 Uma Ki’ik, Ensinu Báziku Sentral (EBC, sigla portugés) Santa Maria Gorrete no Ensinu Pré-Eskolár (EPE) Assisi, observa foos marka Tum-Tum hodi hapara no la autoriza fornese ba estudante sira.
Enkuantu, foos marka Tum-Tum sosa husi kompañia lokál Sailafila Unipesoál, Lda, kada foos saka ida 20 kg ho folin $18,00.
Entretantu, distrusaun ba foos marka Tum-Tum iha fatin lixu Sukaer-Oan ne’e hetan akompaña husi PNTL eskuadra Vikeke Vila, diretór seguransa alimentár munisipál, inspesaun servisu edukasaun Vikeke no ekipa AIFAESA, I.P.
Jornalista : Vitorino Lopes da Costa
Editór : Cancio Ximenes
