VIKEKE, 03 Abríl 2025 (TATOLI)—Prezidente Autoridade munisípiu Vikeke, Francisco C.S de Gonzaga Soares, kuarta (02 Abríl 2025) ne’e, hamutuk ho ekipa inspesaun ba implementasaun Programa Merenda Eskolár (PME) identifika foos marka Tum-Tum fuhuk no sai metan.
Notisia Relevante: Autoridade Vikeke lansa progrma merenda eskolár 2025 iha EBC Baimeta
Nia hatutan, inspesaun urjente ba programa merenda eskolár iha Ensinu Báziku Filiál (EBF) 03 Uma Ki’ik, Ensinu Báziku Sentral (EBC, sigla portugés) Santa Maria Gorrete no Ensinu Pré-Eskolár (EPE) Assisi, konsege indetifika iha foos fuhuk no balun sai metan, nune’e autoridade hapara fornesedór sira utiliza foos ho marka Tum-Tum atu labele tein fornese ba estudante sira.
“Ita sei la fó han ba ita-nia oan sira ho produtu ne’ebé ladi’ak ba sira. Tan ne’e, ha’u hapara ona utiliza foos Tum-Tum hodi tein ba ita-nia oan sira, tanba foos ne’e la serve ba sira atu han no bele fó impaktu ladi’ak ba sira-nia saúde,” PAM Vikeke ne’e hateten hafoin ramata halo inspesaun ba programa merenda eskolár iha postu Vikeke.
Tanba ne’e, autoridade Vikeke ne’e dehan, liuhusi inspesaun ida-ne’e identifika katak foos ne’ebé Ekipa Jestaun Programa (EJP) sira fornese foos ne’ebé la ijene.
“Tanba, ita nota iha foos balun komesa fuhuk to’o metan hotu ona. Diskunfia mós foos ho marka Tum-Tum, 20 kilograma husi nasaun India kontamina ho plastiku. Bainhira halo teste hodi sunu foos referida nabeen hanesan plastiku,” nia dehan.
Ho nune’e, PAM Vikeke komunika kedas ba autoridade seguransa Polisia Nasionál Timor-Leste (PNTL) Vikeke asegura kedas foos marka Tum-Tum hamutuk saku 77 ba iha eskuadra PNTL Vikeke, hodi halo prosesu investigasaun no hein inspesaun direta husi AIFAESA, I.P hodi halo teste ba foos Tum-Tum.
Iha biban ne’e, Koordenadór EJP Cabira-Oan, Apolinário Vicente Soares, haktuir foos marka Tum-Tum sosa husi kompañia lokál Sailafila Unipesoál, Lda, hamutuk saku 123 ho folin kada foos saka ida 20kg ne’e $18,00.
“Foos ne’e ami sosa husi empreza lokál hodi fornese ba programa merenda eskolár. Foos ne’ebé distribui ona ba eskola sia (9) iha postu Vikeke Vila mak hanesan EBF Uma Ki’ik, EBF Tiha Aitahan, EBF Wesa, EBC Santa Maria Gorrete, EPE Sentru Halibur, EPE Max Sthal, EPE Wesa, EPE Assisi,” nia informa.
Entretantu, inspesaun ba Programa Merenda Eskolár (PME) hetan akompaña husi diretór servisu munisipál Seguransa Alimentár no funsionáriu no membru PNTL munisípiu Vikeke.
Notisia Relevante: MAE husu Servisu Edukasaun Vikeke no Autoridade lokál kontrola implementasaun Merenda Eskolár
Jornalista : Vitorino Lopes da Costa
Editór : Cancio Ximenes
