VIKEKE, 28 marsu 2025 (TATOLI)–Ministru Administrasaun Estatál (MAE), Tomás do Rosário Cabral, husu ba Servisu Edukasaun munisípiu Vikeke no Autoridade suku sira atu kontrola implementasaun programa Merenda Eskolár (PME) iha Vikeke.
“Ha’u husu ba Diretór Servisu Edukasaun Vikeke no Xefe suku sira atu kontrola programa Merenda Eskolár ne’ebé implementa iha eskola sira. Ha’u husu ba Diretór Edukasaun atu haruka dadus estudante benifisiáriu programa Merenda Eskolár ba Preizdente Autoridade munisipál hodi haruka ba ha’u atu ha’u bele hatene. Se la haruka dadus benifísiariu ne’e ita la hatene,” Ministru hateten, iha resintu Administrasaun munisípiu Vikeke, sesta ne’e.
Alokasaun orsamentu ba implementasaun programa Merenda Eskolár iha munisípiu Vikeke purvolta millaun $2, enkuantu ba eskola iha Timor laran tomak millaun $33.
“Dekretu-lei númeru 61/2022 kona-ba establesimentu programa Merenda Eskolár ne’e fó dalan ba Xefe suku sira no organizasaun komunitária sira bele fornese hahán ba eskola sira-ne’ebé implementa programa Merenda Eskolár atu osan labele sai, se lae ita-nia osan sai hotu. Tanba ne’e, iha menu indikativu ba programa Merenda Eskolár produtu lokál 75% no produtu importadu 25%,” nia akresenta.
Notísia relevante : Eskola 17 iha Ainaru mak asesu ona merenda eskolár
Nia dehan, setór agrikultór sai fatór determinante ba implementasaum programa Merenda Eskolár, tanba ne’e Servisu Agrikultura munisípiu Vikeke tenke apoiu ekipamentu tratór agrikultór hodi hasa’e produsaun agríkola hodi fornese ai-han ba programa ne’e.
Programa Merenda Eskolár munisípiu Vikeke ba tinan 2025 implementa iha loron 17 Marsu, eskola sira-ne’ebé implementa mak hanesan Ensinu Pre-Eskolar (EPE) ho durasaun loron 117 no EBC inklui filiál sira implementa ho durasaun 104, ne’ebé kada estudante ida benefisia 0,42 sentavu/loron.
Tuir dadus estudante kompostu husi EPE no EBC hamutuk 18 no Ensinu Baziku Filiál hamutuk 77 ho totál ema hamutuk 20.651, ho totál orsamentu hamutuk $915.425.
Husi orsamentu ne’e fahe ba EPE hamutuk $95.836 no aloka ba EBC hamutuk $819.589.
Jornalista : Vitorino Lopes da Costa
Editór : Cancio Ximenes
