VIKEKE, 17 Marsu 2025 (TATOLI)—Autoridade munisípiu Vikeke, segunda ne’e, lansa programa merenda eskolár anu letivu 2025 iha nivel munisípiu ne’ebé realiza iha Ensinu Báziku Sentrál (EBC, sigla portugés) 01 Baimeta, postu Vikeke Vila.
Notísia Relevante: Governu aprova Atribuisaun Subsídiu Programa Merenda Eskolár
Sekretáriu Munisípiu Vikeke asuntu Sosiál no organizasaun komunitáriu, Acacio de Sousa, hateten programa merenda eskolár ne’ebé implementa ne’e diretór EBC no autoridade lokál sira tenke hamutuk hodi kontrola tuir menu merenda eskolár nain.
“Ohin, iha nivel munisípiu Vikeke, ita hahú implementa programa merenda eskolár. Nune’e, ha’u husu jestór eskola sira no autoridade lokál sira, ita hamutuk hodi kontrola, atu ita fornese ai-han ne’ebé ijeniku no nutritivu ba ita-nia oan sira,” Acacio de Sousa hateten iha serimónia lansamentu programa merenda eskolár ne’ebé realiza iha EBC 01 Baimeta, Beloi,
Aleinde ne’e, nia husu ekipa jestaun programa merenda eskolár sira tenke fornese ai-han produtu lokál 75% no produtu importasaun ne’e 25%.
“Ba ai-han importasaun ne’e la’ós ita sosa fali ayam potong no sosis mak fó ba ita-nia oan sira ne’e, labele. Karik, foos lokál mak la to’o, entaun ita bele sosa foos importasaun sira maibé foos lokál iha entaun di’ak-liu ita uza mak ida-ne’e hodi tein fó ba ita-nia oan sira,” nia dehan.
Diretór Servisu Edukasaun Munisípiu Vikeke, Julio Sakadura, hateten implementasaun programa merenda eskolár munisipiu Vikeke ne’e, orsamentu aloka hotu ona ba kada eskola implementadór sira.
“Ba lansamentu ida-ne’e, hahú oin eskola hotu-hotu implementa programa merenda eskolár. Iha implementasaun ne’e, ministériu edukasaun fiskaliza husi munisípiu, saúde no alimentasaun sei monitoriza atividade programa merenda eskolár hodi implementa iha baze bazeia ba matadalan no tuir menu ne’ebé iha,” nia hateten.
Diretór EBC 01 Baimeta Vikeke Vila, Abilio Baptista da Costa, haktuir EBC 01 Baimeta Vikeke Vila ho ninia filiál sira prontu apoiu programa merenda eskolár ba tinan 2025 no sei tau matan ba programa referidu.
“Ami sei apoiu no tau matan ba programa merenda eskolár ne’ebé implementa iha ami-nia eskola no filiál sira, atu ita-nia oan sira simu ai-han bazeia ba menu ne’ebé ami simu,” nia dehan.
Nai relata, dadus EBC 01 Baimeta Vikeke Vila ho ninia filiál hamutuk haat (4) no Ensinu Pre-Eskolár (EPE) rua (2) ho totál estudante hamutuk 1.431 no profesór hamutuk na’in-85.
Entretantu, programa merenda eskolár ba Ensinu Pre-Eskolar (EPE) ho durasaun loron 117 no EBC inklui filiál sira implementa durasaun loron 104, ne’ebé kada estudante ida benfisia ba $04,2 sentavu.
Tuir dadus ne’ebé rekolla husi EPE no EBC hamutuk 18 no Ensinu Baziku Filiál hamutuk 77 ho totál estudante hamutuk 20.651, ho totál orsamentu hamutuk $915,425. Husi orsamentu ne’e fahe ba EPE hamutuk $95,836 no aloka ba EBC hamutuk $819,589.
Iha serimónia lansamentu programa merenda eskolár ne’e, sekretáriu munisípiu ofsialmente entre hahan merenda eskolár ba estudante EBC 01 Baimeta Vikeke Vila.
Lansamentu programa merenda eskolár ne’e partisipa husi diretór fiskalizasaun, diretór servisu agrikultura, diretór alimentar, administradór postu Vikeke Vila, diretór EBC no EJP sira iha munisípiu Vikeke.
Notísia Relevante: Dirijente eskola sira husu ME kontrola programa merenda eskolár
Jornalista : Vitorino Lopes da Costa
Editór : Cancio Ximenes
