DILI, 11 Abríl 2025 (TATOLI)—Komisaun A iha Parlamentu Nasionál (PN) ne’ebé trata asuntu Justisa no Konstituisionál, sesta ne’e, ho Ministériu Justisa hala’o audiénsia ba proposta-lei númeru 16/VI(2a), alterasaun daruak lei númeru 25/2021, 2 Dezembru, Lei Organizasaun Judisiária.
Ministru Justisa, Sérgio Hornai, hateten, alterasaun ne’e ho vizaun polítika atu hametin fali lakuna sira iha lei no bele halo komplementaridade ba lei anteriór sira.
“Iha artigu 77 ne’ebé ho hanoin atu define filafali Prezidente Tribunál Rekursu atuál halo fali nomeasaun sira tanba ita-nia lei hateten Prezidente Repúblika nia kompeténsia só nomea Prezidente Tribunál Supremu no Prezidente Tribunál Rekursu sei eskolla entre juís sira ne’ebé konstitui iha Tribunál Rekursu,” Ministru hato’o hafoin audiénsia iha resintu PN.
Notisiarelevante : PN halo diskusaun alterasaun lei Organizasaun Judisiáriu ho karatér urjénsia
Tanba ne’e mak halo armonizasaun nune’e bele fó konformidade ba lei ne’e no iha tempu hanesan Prezidente Repúblika bele konfortável liu ein termu polítiku no Konstituisaun hodi ezerse nia funsaun atu aplika tuir artigu 86 Konstituisaun.
Ministru katak, Estadu Timor seidauk estabelese Supremu Tribunál Justisa dentru prazu tuir lei ne’e.
“Entaun hanesan Governante prazu 30 mezes komforme espíritu lei nian atu estabelese Tribunál Rekursu no Tribunál Supremu, ho ida-ne’e mak Governu haree tempu ne’e badak nia sei termina juñu 2025 hanoin bele halo lai alterasaun,” nia akresenta.
Notísiarelevante : Sergio Hornai klarifika razaun Governu halo alterasaun ba Lei Organizasaun Judisiária
Nune’e, komisaun rekrutamentu selesaun ba juís instaladu iha Tribunál Supremu bele halo preprasaun másimu no kuadru sira bele halo preparasaun na alargamentu mapa judisiáriu iha Tribunál Supremu no Tribunál Rekursu ne’ebé fora husi fatin sira iha Dili, ne’ebé halo planu atu halo alargamentu.
Jornalista : Nelson de Sousa
Editora : Julia Chatarina
