DILI, 11 Abríl 2025 (TATOLI)-Prezidente Repúblika Demokrátika Timor-Leste, José Ramos Horta, subliña kompromísu importante tolu husi organizasaun g7+ nian, iha atividade 6a reuniaun inter-ministeriál g7+, ne’ebé hala’o iha Sentru Konvensaun Dili (CCD), nian iha ámbitu selebrasaun loron aniversáriu g7+ ba da-15.
Kompromisu sira ne’e, tuir prezidente mak dahuluk ita tenke hamutuk ho advokasaun ne’ebé mak reformadu iha instituisaun internasionál; Ita tenke hametin solidariedade, tanba ida-ne’e mak forsa prinsipál husi g7+; Ikus liu mak ita tenke promove propriedade nasionál husi aspetu estabilidade no dezenvolvimentu.
“Agora ita tenke konstrui monumentu ida hodi garante katak advokasaun ita-nia sai reformadu ne’ebé mak reál no kontinua halo empodera hodi forma hanoin ne’ebé mak di’ak iha futuru mai”, Prezidente ne’e apelu.
Xefe Estadu ne’e hateten, movimentu ida hodi garante katak, nasaun ne’ebé infrenta konflitu, nafatin iha lian ne’ebé ativu hodi forma sira-nia futuru rasik, vizaun ida-ne’e tenke valoriza no kontinua guia futuru ne’ebé mak di’ak.
“Esperiénsia husi moris ne’e mak forma konfiansa ami-nia katak nasaun ne’ebé mak frakeza tenke determina sira-nia dalan rasik ba prosesu estabilidade”, órgaun soberanu ne’e informa.
Nia relembra, bainhira primeira vez harii oranizasaun g7+ iha tinan-2010, momentu ne’ebá nia asume knaar nu’udar prezidente daruak iha Timor-Leste, nia akompaña rasik inspirasaun husi nasaun fundadór no membru sira ne’ebé infrenta funu, frakeza, no frajíl. Sira hamutuk ho vizaun ne’ebé mak brani hodi luta hamutuk sai plataforma ida de’it ba transformasaun.
“Ami intende katak bainhira estabilidade ne’e kontinua tenke dudu husi imi ne’ebé mak daudaun ne’e hala’o hela ninia papél rasik”, nia dehan.
Nia haktuir, durante ezisténsia g7+ hala’o ninia servisu sein para, hodi haforsa lian husi nasaun hirak-ne’ebé infrenta konflitu, hodi garante katak, dezafiu no aspirasaun sira-nia hala’o iha meza redonda globál, esforsu hodi defende pás no estabilidade.
“Ho nune’e, ha’u hato’o apresiasaun boot ba prezidente g7+, no ninia membru nasaun sira, liuliu ba Sekretáriu Jerál g7+ ba esforsu ne’ebé mak lakole hodi halo dezenvolvimentu ba organizasaun naun-governamentál ida-ne’e”, nia hato’o .
Maibé, tuir líder timoroan ne’e katak responsabilidade boot ba pás no estabilidade mai husi ita-nia an rasik, vizaun ba pás mak hanesan tolerasaun no unidade ne’e mak sei forma esforsu nasionál ita-nian iha momentu ne’e hanesan propriedade nasionál ba prosesu pás ne’ebé fundamentál ba ita-nia susesu. Motivasaun ba nasaun ne’ebé mak frakeza tenke determina sira-nia dalan rasik ba prosesu estabilidade.
Notísia relevante:Kenyeh Barlay: “g7+ tenke sai éroi ba seguransa, estabilidade iha nasaun frajíl”
Jornalista: Alexandra da Costa
Editór: Rafael Ximenes de A. Belo
